नागपूर : इंदिरा गांधी शासकीय वैद्यकीय महाविद्यालय व रुग्णालयातील (मेयो) दोन्ही एक्स-रे यंत्र आठवड्यापासून बंद पडल्याने विशेषत: गंभीर आजाराचे रुग्ण अडचणीत आले आहेत. रुग्णांना पदरमोड करून बाहेरून खासगी केंद्रातून एक्स-रे करावे लागत आहे. रुग्णालय प्रशासन यंत्र दुरुस्तीसाठी प्रयत्न करीत असले तरी मोठा बिघाड असल्याने यंत्र सुरू होण्यास आणखी काही दिवस लागण्याची शक्यता आहे.
कोरोनाचा दुसऱ्या लाटेचा जोर कमी होताच ‘नॉन कोविड’च्या रुग्णांत वाढ झाली आहे. सर्जिकल कॉम्प्लेक्समध्ये आर्थाेपेडीक्स, ईएनटी, नेत्र व सर्जिकल विभाग सुरू झाले आहे. मेडिसीन विभागातही रुग्ण वाढत चालले आहे. परंतु आजाराचे निदान करण्यासाठी आवश्यक असलेले एक्स-रे सारखे यंत्र बंद पडल्याने रुग्णसेवेला याचा फटका बसत आहे. मेयोमध्ये दोन एक्स-रे यंत्र आहेत. यातील एक यंत्र महिन्याभरापूर्वीच बंद पडले. यामुळे एकाच मशीनवर रुग्णांचा भार होता. यातच गर्दी वाढल्याने रुग्णाला दुखणे सहन करीत दोन-तीन तास रांगेत उभे रहावे लागत होते. याच दरम्यान बुधवारी दुसरे यंत्रही बंद पडले. प्राप्त माहितीनुसार, महिन्याभरापासून बंद असलेल्या एक्स-रे मशीनच्या देखभाल व दुरुस्तीचे पैसे मागील दोन वर्षांपासून थकीत आहेत. यामुळे हे यंत्रच दुरुस्त झाले नाही. नुकतेच बंद पडलेल्या यंत्राचा एक मोठा पार्ट निकामी झाला आहे. संबंधित कंपनीला याची माहिती दिली असली तरी दुरुस्तीसाठी आणखी काही दिवस लागण्याची शक्यता आहे. अधिष्ठाता डॉ. अजय केवलिया यांच्याशी या संदर्भात विचारणा केली असता त्यांनी दोन्ही यंत्र बंद असल्याच्या वृत्ताला दुजोरा दिला. ते म्हणाले, लवकरच यातील एक यंत्र सुरू होईल. नव्या एक्स-रे यंत्राचा प्रस्ताव नसल्याचेही ते म्हणाले.