लोकमत न्यूज नेटवर्क
नागपूर : अनेक वर्षांपासून सुरू असलेल्या गंगाजमुनातील वारांगनांच्या देहविक्रयावर पोलिसांनी घातलेली बंदी आज स्वातंत्र्यदिनी आंदोलकांनी उलथवून टाकली. वेश्यावस्तीला पोलिसांनी लावलेले बॅरिकेड्स उलथवून तेथील टिनही फेकून दिले. विदर्भातील सर्वात मोठी वेश्यांची वस्ती म्हणून ओळखल्या जाणाऱ्या गंगाजमुनात वेश्याव्यवसाय बंद करण्यासाठी पोलिसांनी आक्रमक पवित्रा घेतला आहे. चार दिवसांपूर्वी या वस्तीच्या आजूबाजूचे रस्ते पोलिसांनी बॅरिकेड्स लावून बंद केले. काही ठिकाणी टिनही उभे केले. या वस्तीसाठी पोलिसांनी विशेषाधिकाराचा वापर करून कलम १४४ लागू केले. येथे येणाऱ्या ग्राहकांवर कडक कारवाई केली जाईल, असा इशाराही देण्यात आला.
या कारवाईचा येथील वारांगनांसोबतच काही सामाजिक संघटनांनीही तीव्र विरोध केला आहे. राष्ट्रवादीच्या स्थानिक महिला नेत्या ज्वाला धोटे यांनी या कारवाईचा पहिल्या दिवसांपासूनच तीव्र विरोध चालवला आहे. वारांगनांचे आधी पुनर्वसन करा आणि नंतर त्यांना येथून हुसकावून लावा, अशी मागणी त्यांनी केली होती. त्यांच्या जगण्याचा अधिकार हिरावून घेण्याचा अधिकार कुणालाही नसल्याचेही म्हटले होते. पोलिसांनी १४ ऑगस्टपर्यंत येथील बॅरिकेड्स काढले नाहीत तर १५ ऑगस्टला आंदोलन करण्याचा इशाराही त्यांनी दिला होता. त्यानुसार पोलिसांनी रविवारी सकाळपासूनच येथे मोठा बंदोबस्त लावला. मोठ्या प्रमाणात महिला पोलिसही नेमले होते. त्याला न जुमानता ज्वाला धोटे आपल्या कार्यकर्त्यांसह येथे पोहोचल्या. त्यांनी वारांगनांना एकत्रित करून कार्यकर्त्यांच्या मदतीने पोलिसांनी लावलेले बॅरिकेड्स् हटविले. टिनही काढून टाकले. या घडामोडीमुळे गंगाजमुना परिसरात प्रचंड तणाव निर्माण झाला. माहिती कळताच पोलीस उपायुक्त लोहित मतानी आणि अन्य वरिष्ठ अधिकाऱ्यांनी घटनास्थळी धाव घेतली. त्यांनी जमावाची समजूत काढली. त्यानंतर वातावरण निवळले.
---
कलम १८८ अन्वये गुन्हा दाखल
लकडगंज
पोलिसांनी या प्रकरणात रविवारी सायंकाळी आंदोलकांवर साथरोग प्रतिबंधक कायद्याचे कलम १८८ अन्वये गुन्हा दाखल केला.