लोकमत न्यूज नेटवर्क
नागपूर - बेदरकारपणे वाहन चालविणाऱ्या एका आरोपीला नीट गाडी चालवण्याचा सल्ला देणे एका व्यक्तीला चांगलेच महागात पडले. त्या आरोपीने क्षुल्लक कारणावरून आपल्या साथीदारांसह सल्ला देणाऱ्या आणि त्यांच्या एका मित्रावर हल्ला चढवून त्यांना गंभीर जखमी केले. कोतवाली पोलीस ठाण्याच्या हद्दीत नबाबपुऱ्यातील राममंदिराजवळ शनिवारी रात्री ९.३० च्या सुमारास ही संतापजनक घटना घडली.
मकरंद किशोर किटकरू (वय ३४) हे त्यांच्या घराजवळ शनिवारी रात्री मित्र धनंजय जुमळेसह बसून गप्पा करीत होते. तेवढ्यात आरोपी नीरज लारोकर हा वेगात वाहन चालवत आला. मकरंद यांनी त्याला नीट गाडी चालव असे म्हटले. त्यावरून आरोपीने मकरंद यांच्याशी वाद घातला. प्रकरण हातघाईवर आल्यानंतर आरोपी लारोकरने त्याचे साथीदार क्रिश चाैधरी, तुशार कंकाळ, आदर्श वैद्य, सोहेल शेख, वृशभ बेंद्रे आणि अन्य दोन ते तीन साथीदारांना फोन करून घटनास्थळी बोलवून घेतले. साथीदार तेथे आल्यानंतर आरोपी लारोकरने धनंजय यास विट फेकून मारली. नंतर त्याच्यावर चाकूने हल्ला चढवला. आरडाओरड ऐकून शेजारची मंडळी धावल्याने आरोपी पळून गेले. या घटनेमुळे परिसरात तणावपूर्ण वातावरण निर्माण झाले. माहिती कळताच कोतवाली पोलीस पोहचले. मकरंद यांच्या तक्रारीवरून कोतवाली पोलिसांनी उपरोक्त आरोपींविरुद्ध गैरकायद्याची मंडळी जमवून प्राणघातक हल्ला केल्याच्या आरोपाखाली गुन्हा दाखल केला. आरोपीचा शोध घेतला जात आहे.
---