नागपूर : इंडियन ऑईल काॅर्पोरेशनने मुंबई येथे एका समारंभात एसटी महामंडळाच्या नागपूर विभागातील गणेशपेठ आगाराला ८७,६७० लिटर डिझेलची बचत केल्याबद्दल ५० हजाराचा पुरस्कार देऊन गौरवान्वित केले आहे. तर वर्धमाननगर आगारालाही चषक देण्यात आले आहे.
भारत सरकारच्या पेट्रोलियम कन्झर्व्हेशन रिसर्च असोसिएशन (पीसीआरए) आणि इंडियन ऑईल काॅर्पोरेशनच्या वतीने अधिक डिझेल बचत करणाऱ्या आगारांना पारितोषिकांची घोषणा केली होती. यात २०१९-२० या वर्षात गणेशपेठ आगाराने संपूर्ण राज्यभरातून बाजी मारत वर्षभरात ८७,६७० लिटर डिझेलची बचत केली. या बचतीच्या माध्यमातून गणेशपेठ आगाराचे ७० लाख रुपये वाचले आहे. गणेशपेठ आगाराला बेस्ट डेपो इन महाराष्ट्र म्हणून सन्मानित करण्यात आले. ‘पीसीआरए’चे महाव्यवस्थापक कांबळे यांच्या हस्ते गणेशपेठ आगाराचे व्यवस्थापक अनिल आमनेरकर यांना सन्मानचिन्ह, प्रशस्तीपत्र आणि ५० हजाराचा रोख पुरस्कार प्रदान करण्यात आला. तर वर्धमाननगर आगाराने १० लिटरमागे ५४.२६ किलोमीटर बसेस चालविल्या. इंडियन ऑईल काॅर्पोरेशनचे मुख्य महाव्यवस्थापक गांगुली यांच्या हस्ते वर्धमाननगर आगाराचे व्यवस्थापक गौरीशंकर भगत यांना चषक देण्यात आले आहे.
...........