औरंगाबाद, दि. २ - मागच्या अनेक दिवसांपासून औरंगाबादकर ज्याची आतुरतेने वाटत पाहत होते, त्या 'रॉक ऑन २' कॉन्सर्टचा दिवस अखेर उजाडला आहे. आतापर्यंत या शहराने कधीही न पाहिलेला असा हा 'न भूतो, न भविष्यती' कार्यक्रम तमाम संगीतप्रेमींच्या उपस्थितीत संध्याकाळी ६ वाजता बीड बायपास रोडवरील जबिंदा इस्टेटवर पार पडणार असून शोची जय्यत तयारी पूर्ण झाली आहे.
'टाटा टी गोल्ड' प्रस्तुत 'लोकमत रॉक ऑन २ - लाईव्ह इन कॉन्सर्ट' पॉवर्ड बाय 'एम. के. कन्स्ट्रक्शन्स' व 'ई-राईडस्'मध्ये 'रॉक ऑन २' चित्रपटातील फरहान अख्तर, श्रद्धा कपूर, अर्जुन रामपाल आणि पुरब कोहली असे तरुणाईचे लाडके सिनेकलावंत धमाकेदार रॉक शो सादर करणार आहेत. कॉन्सर्टच्या निमित्ताने औरंगाबादकर रॉक संगीताचा जल्लोष, उत्साह, झिंग अनुभवणार आहेत. आपल्या आवडत्या कलाकारांना प्रत्यक्ष परफॉर्म करताना पाहण्यासाठी तरुणाई तर एक-एक दिवस मोजत आजच्या दिवसाची वाट पाहत होती. रॉक संगीताच्या गजरात थिरकण्यासाठी हजारोंच्या संख्येने शहरवासीय कॉन्सर्टला उपस्थित राहणार आहेत. कोहिनूर अहमदनगर हे कॉन्सर्टचे सहप्रायोजक असून मॉल पार्टनर प्रोझोन, आऊटडोअर पार्टनर ड्रीम्स क्रिएशन, रेडिओ पार्टनर रेडिओ मिर्ची आणि कम्युनिकेशन पार्टनर आयसेन्स अॅपल स्टोर आहे.