उद्धव ठाकरे सहभागी, आठवलेंचा बहिष्कार!

पाकिस्तानचे पंतप्रधान नवाज शरीफ यांना नरेंद्र मोदी मंत्रिमंडळाच्या शपथविधीला निमंत्रित केल्यानंतर शिवसेनेने नाराजीचा सूर आळवला होता

नवी दिल्ली : पाकिस्तानचे पंतप्रधान नवाज शरीफ यांना नरेंद्र मोदी मंत्रिमंडळाच्या शपथविधीला निमंत्रित केल्यानंतर शिवसेनेने नाराजीचा सूर आळवला होता पण शिवसेनेचे पक्षप्रमुख उद्धव ठाकरे हे आजच्या शपथविधी समारंभाला सहकुटुंब उपस्थित राहिले. दुसरीकडे मंत्रिपदाची संधी न मिळालेले रिपाइंचे अध्यक्ष खा.रामदास आठवले यांनी मात्र शपथविधी समारंभाला पाठ दाखवत एकप्रकारे नाराजी व्यक्त केली. त्यांचा मंत्रिमंडळात समावेश होणार नाही हे सकाळी आणखीच स्पष्ट झाले होते. तथापि, त्यांचे कुटुंबीय मुंबईहून दुपारी दिल्लीत येणार असल्याने पुन्हा काही घडामोड झाली का अशी चर्चा महाराष्ट्र सदनात सुरू झाली. मात्र, तसे काहीही घडले नाही.आठवले सायंकाळी सहकुटुंब बाहेर फिरायला निघून गेले. ठाकरे, त्यांच्या पत्नी रश्मी आणि मुलगा आदित्य आणि शिवसेनेचे सगळे खासदार समारंभाला हजर होते. उद्धव हे नरेंद्र मोदी यांचे निकटवर्ती अमित शहा यांच्या बाजूला बसले होते. मराठी आणि गुजराती नेते आजूबाजूला बसल्याचे या निमित्ताने बघायला मिळाले.शिवसेनेचे अनंत गीते यांनी कॅबिनेट मंत्रीपदाची शपथ घेतली. (विशेष प्रतिनिधी)