ऑनलाइन लोकमत
लोणावळा,दि.7 - मुंबई पुणे द्रुतगती मार्गावर कामशेत बोगदा ते ताजे पेट्रोलपंप दरम्यान आज सकाळी आठ वाजण्याच्या सुमारास अंड्यांनी भरलेला ट्रक व क्रेन यांच्यात झालेल्या अपघातानंतर मुंबईकडे येणारी वाहतूक ठप्प झाली होती. तब्बल अडीच तासानंतर ही वाहतूक सुरळीत करण्यात यंत्रणेला यश आले आहे.
आज सकाळी सव्वाआठ वाजण्याच्या सुमारास पुण्याहून मुंबईच्या दिशेने भरधाव वेगात निघालेला अंड्याचा ट्रक कामशेतचा बोगदा पार करुन पुढे येताच समोर जाणार्या एका क्रेनवर मागून आदळल्याने हा अपघात झाला होता. अपघातात ट्रकच्या केबिनचा चक्काचूर झाला व अंड्याचे ट्रे तसेच अंडी ही रस्त्यावर सर्वत्र पसरल्याने रस्ता चिकट झाला होता. दहा वाजण्याच्या सुमारास ही अपघातग्रस्त वाहने बाजुला करत आयआरबीचा पाण्याचा टँकर व अग्नीशमन बंबाच्या सहाय्याने रस्त्यावर पाणी मारत सर्व रस्ता साफ करण्यात आला.
सुरुवातीला एका लेनवरुन वाहतूक सुरु करत नंतर तिनही लेन वाहतुकीला खुल्या करण्यात आल्या. आज रविवार हा सुट्टीचा दिवस असल्याने द्रुतगतीवर वाहनांची संख्या मोठी होती. यामुळे मार्गावर लांबच लांब वाहनांच्या रांगा लागल्या होत्या. 10:45 वाजण्याच्या सुमारास या मार्गावरील वाहतुक सुरळीत सुरु होऊन पुर्वपदावर आली.