चोरांनी ग्राहक बनून केले कपडे लंपास

सणासुदीच्या काळात खरेदीसाठी सर्वच बाजारात मोठी गर्दी पाहायला मिळतेय.

मुंबई : सणासुदीच्या काळात खरेदीसाठी सर्वच बाजारात मोठी गर्दी पाहायला मिळतेय. त्यातच ग्राहकाचे सोंग घेऊन दुकानात जात महागड्या वस्तू लंपास करणाऱ्या चोरांच्या टोळ्या देखील सक्रिय झाल्याची धक्कादायक माहिती समोर येत आहे. त्याचा फटका शनिवारी कांदिवलीच्या मॉलमधील एका दुकानाला बसला. चार अनोळखी इसमांनी हजारोंचे महागडे कपडे पळवून नेले. याबाबत समता नगर पोलीस ठाण्यात चौघांवर गुन्हा दाखल करण्यात आला आहे.कांदिवलीच्या ग्रोव्हल्स मॉलमध्ये असलेल्या झोडियाक नामक दुकानात हा प्रकार घडला. पोलिसांनी दिलेल्या माहितीनुसार, शनिवारी तळ मजल्यावर असलेल्या या दुकानात पाऊणे तीनच्या सुमारास वीस ते पंचवीस वयोगटातील चार अनोळखी इसम शिरले. त्यावेळी दुकानात रामचंद्र बागवे (२८)हे सेल्समन एकटेच होते. यातील एकाने बागवे यांना बोलण्यात गुंतवले तर उर्वरित तिघांनी शर्ट आणि पॅन्ट ट्राय करण्याचा बनाव करत ट्रायल रूम मध्ये नेले. बरेच कपडे पाहिल्यानंतर ते पसंत न पडल्याचे सांगत ते बाहेर पडले. त्यांच्या मागोमाग चौथा इसमही बाहेर पडला. तेव्हा ट्राय केलेले कपडे पुन्हा रॅकमध्ये लावण्याच्या उद्देशाने बागवे ट्रायल रूममध्ये गेले तेव्हा कपडे गायब असल्याचे त्यांच्या लक्षात आले. त्यांनी दुकानातील सर्व कपडे मोजले आणि पुन्हा स्टॉक तपासला. तेव्हा महागडया ब्रँडचे सोळा ते सतरा कपडे गायब असल्याचे त्यांच्या लक्षात आले. याबाबत त्यांनी मालकांना कळविले. आणि पोलीस ठाण्यात तक्रार दाखल केली. मुख्य म्हणजे या दुकानात सीसीटीव्ही तसेच स्कॅनर मशिनही नाही, ही बाब चोरांना माहित असावी. त्यानुसार त्यांनी या दुकानाला टार्गेट केल्याचा संशय पोलिसांकडून व्यक्त केला जातोय. त्यानुसार चार अनोळखी इसमावर गुन्हा दाखल करण्यात आला असून याप्रकरणी अधीक चौकशी सुरु असल्याची माहिती पोलिसांनी दिली. (प्रतिनिधी)>सीसीटीव्ही अस्पष्ट !दुकानात सीसी टीव्ही नसल्याने मॉलच्या मुख्य प्रवेश द्वारावरचे सीसीटीव्ही फुटेज पोलिसांनी पडताळून पाहिले. ज्यात ते संशयित इसम दिसत आहेत. मात्र ते फारच अस्पष्ट असल्याने पोलिसांना त्यांची ओळख पटविण्यात अडथळे येत असल्याचे त्यांनी सांगितले.