ऑनलाइन लोकमत
पुणे, दि. २२ : टेमघर धरणाची गळती रोखण्यासाठी या धरणाचे काम तातडीने घेण्यात येणार आहे. मात्र, खडकवासला धरण १०० टक्के भरले असल्याने टेमघर धरणातून मोठया प्रमाणात पाणी सोडणे शक्य नसल्याने हे धरण डिसेंबर पर्यंत हे धरण दूरूस्तीसाठी रिकामे करण्याचे नियोजन पाटबंधारे विभागाकडून करण्यात आले असल्याची माहिती सुत्रांकडून देण्यात आली. या धरणाची क्षमता ३.८१ टीएमसी असून सध्या धरणात ९० टक्के पाणीसाठा आहे. त्यामुळे गळती रोखण्यासाठी आवश्यक असलेला पाणीसाठा कमी केला जाणार असून तो २.३१ ते २.८१ इतका पाणी साठा शिल्लक ठेवला जाणार असल्याचे सांगण्यात आले.
टेमघर धरणातून तब्बल ६०० लिटर पाण्याची प्रतिसेकंद गळती होत आहे. सेकंदांचा हिशोब मांडला तर ते फारसे काही विशेष वाटत नाही. ही गळती दिवसांमध्ये मोजल्यास एका दिवसाचे ८६,४०० सेकंद म्हणजे दिवसाला ५,१८,४०,००० याचा अर्थ दिवसाला पाच कोटी अठरा लाख चाळीस हजार लिटर पाण्याची गळती होते. एका महिन्याचा हिशेब मांडला तर एकशे पंचावन्न कोटी बावन्न लाख लिटर पाण्याची गळती होत आहे.पुण्यात प्रती व्यक्ती प्रती दिन १४० लिटर पाणी दिले जाते ( किमान तसे म्हटले जाते) हाच हिशेब मांडला तर दिवसाला ३,७०,२८५ ( तीन लाख सत्तर हजार दोनशे पंच्याऐंशी ) लोकांना पुरेले एवढे पाणी वाया जात आहे.
तर या गळतीमुळे धरणाला धोकाही निर्माण झाला आहे. त्यामुळे जलसंपदा विभागाकडून तातडीने या धरणाच्या दुरूस्तीचे काम हाती घेण्यात येणार आहे. या धरणांमध्ये आज अखेर ९० टक्के पाणीसाठा आहे. तसेच हे पाणी सध्या सोडल्यास ते खडकवासला धरणातून नदीत सोडावे लागेल. त्यामुळे पाणी नदीत न सोडता सोडावे लागणारे पाणी पुणे शहर तसेच कालव्याद्वारे सिंचनासाठी सोडण्याचे नियोजन करण्यात आले आहे. त्यानुसार आधी खडकवासला धरणातील पाणी पुणे शहर तसेच सिंचनासाठी सोडून नंतर टेमघर धरणातील पाणी खडकवासला धरणात सोडण्यात येणार आहे. त्यानंतर डिसेंबर मध्ये धरणाचे दुरूस्तीचे काम करण्याचे काम नियोजन असल्याचे सुत्रांनी स्पष्ट केले.