अकोला: युवतीला लग्नाचे आमिष दाखवून तिचे लैंगिक शोषण करून, नंतर लग्नास नकार दिल्याने युवतीने जाळून घेतल्याची घटना सोमवारी दुपारी १२ वाजताच्या सुमारास घडली. युवती ९८ टक्के जळाल्याने उशिरा रात्री तिचा उपचारादरम्यान मृत्यू झाला. युवतीला आत्महत्येस प्रवृत्त केल्याप्रकरणी युवकासह नऊ जणांवर गुन्हा दाखल करण्यात आला. युवतीच्या भावाने दिलेल्या तक्रारीनुसार, त्यांची २५ वर्षीय बहीण शहरातील विधी महाविद्यालयात एलएलबी अंतिम वर्षाला शिकत होती. दीड ते दोन वर्षांंपासून तिचे जठारपेठेतील ज्योती नगरात राहणारा अमोल अशोक बेलसरे याच्यासोबत प्रेमसंबंध होते. अमोलने तिला लग्नाचे आमिष दाखवून तिच्यासोबत शारीरिक संबंध प्रस्थापित करून तिचे शोषण केले. दोघे पुण्याला जाऊन लग्न करणार होते; परंतु त्यांच्या लग्नाला अमोलचे आई-वडील व इतर नातेवाइकांचा विरोध होता. त्यानंतर हा वाद सामोपचाराने मिटवण्यात आला. कुटुंबीयांनीसुद्धा दोघांच्या लग्नास संमती दिली; परंतु पुढे पुन्हा वाद निर्माण झाला. आई-वडील व नातेवाइकांनी अमोलची समजूत काढून त्या युवतीसोबत लग्न न करण्यास त्यास बजावले. त्यामुळे आरोपी अमोल हा युवतीला टाळू लागला. तिने संपर्क करण्याचा प्रयत्न केला तर आरोपी अमोल, आई-वडील व त्याचे नातेवाईक युवतीचा शारीरिक व मानसिक छळ करू लागले. तिला धमक्या देऊ लागले. अखेर युवतीने या त्रासाला कंटाळून १ ऑगस्ट रोजी दुपारी १२ वाजताच्या सुमारास अंगावर रॉकेल ओतून स्वत:ला जाळून घेतले. यात युवती ९८ टक्के जळाली. तिला सर्वोपचार रुग्णालयात दाखल करण्यात आले. सोमवारी दुपारी तिला खासगी रुग्णालयात हलविण्यात आले; परंतु रात्री तिचा मृत्यू झाला. युवतीच्या भावाच्या तक्रारीनुसार जुने शहर पोलिसांनी मंगळवारी सायंकाळी भादंवि कलम ३0६(३४) नुसार गुन्हा दाखल केला.
*या आरोपींवर गुन्हा दाखल जुने शहर पोलिसांनी ज्योती नगरातील अमोल बेलसरे, अशोक बेलसरे, शीला बेलसरे, पूजा बेलसरे यांच्यासह संतोष हुशे, सचिन मसने, सागर काळे, अक्षय लोखंडे, नीलेश नावकार, संतोष लोखंडे यांच्यावर गुन्हा दाखल केला.
*वकील होण्याचे स्वप्न अधुरेच.. युवती ही शहरातील एका विधी महाविद्यालयामध्ये एलएलबी अंतिम वर्षाला शिकत होती. पुढील वर्षी ती वकील होणार होती. वकील होण्याचे तिचे स्वप्न होते; परंतु आरोपींच्या छळामुळे तिचे स्वप्न धुळीस मिळाल्याचा आरोप तिच्या भावाने केला.