मुंबई : एसटी महामंडळाच्या २.५0 टक्के भाडेवाढीच्या प्रस्तावाला राज्य परिवहन प्राधिकरणाने मंगळवारी मंजुरी दिली. १ जूनपासून एसटीचे नवीन दर लागू केले जाणार त्यामुळे एसटी प्रवाशांच्या खिशाला कात्री लागेल. या भाडेवाढीतून महामंडळाला तब्बल १00 कोटी रुपये वर्षाकाठी मिळणार आहेत. डिझेलच्या दरात नुकतीच १ रुपये ९ पैसे दरवाढ करण्यात आली. त्यामुळे वर्षाला महामंडळावर आणखी ४ कोटी रुपयांचा बोजा पडणार आहे. सध्या महामंडळाला दररोज ११ ते १३ लाख लिटर डिझेल लागते. या डिझेलपोटी वर्षाला २00 कोटी रुपयांपेक्षा जास्त पैसे महामंडळाला मोजावे लागतात. वाढलेल्या डिझेल दरामुळे हा आर्थिक बोजा वाढणार असल्याने महामंडळाने २.५0 टक्के भाडेवाढीचा प्रस्ताव बनवला होता. हा प्रस्ताव राज्य परिवहन प्राधिकरणाच्या बैठकीत एसटी महामंडळाने सादर केला आणि त्यावर झालेल्या चर्चेनतर या भाडेवाढीला मंजुरी देण्यात आली. याबाबत राज्य परिवहन सचिव आणि राज्य परिवहन प्राधिकरणाचे अध्यक्ष शैलेश कुमार शर्मा यांनी सांगितले की, पहिल्या दोन टप्प्यांसाठी भाडेवाढ नाही. त्यानंतर भाडेवाढ लागू करण्यात आली आहे. एसी बसमध्ये भाडेवाढीचा प्रस्ताव मात्र तयार करण्यात आला नसल्याचे सांगण्यात आले.
एसटीची भाडेवाढ
By admin | Updated: May 28, 2014 04:28 IST