ऑनलाइन लोकमत
मुंबई, दि. 14 - बेस्ट कामगारापासून ते नगरसेवकापर्यंत प्रवास करणा-या अनिल कोकीळ यांना शिवसेनेने थेट बेस्ट समितीचं अध्यक्षपद दिलं आहे. विशेष म्हणजे पहिल्यांदाच नगरसेवक म्हणून निवडून आलेल्या अनिल कोकीळ यांच्या खांद्यावर शिवसेनेने महत्वाची जबाबदारी टाकत विश्वास दाखवला आहे. नगरेसवकपदाच्या पहिल्याच टर्ममध्ये कोकीळ यांच्या पारड्यात थेट बेस्ट समितीचं अध्यक्षपद पडलं आहे.
मुंबई महापालिकेच्या बेस्ट समिती अध्यक्षपदासाठी शिवसेनेकडून अनिल कोकीळ यांच्या नावावर शिक्कामोर्तब झाला आहे. शिवसेनाप्रणित बेस्ट कामगार सेनेचे पदाधिकारी असणारे अनिल कोकीळ पहिल्यांदाच नगरसेवक म्हणून निवडून आले आहेत.
अनिल कोकीळ हे परळ गावातून शिवसेनेचे नगरसेवक म्हणून निवडून आले आहेत. याआधी अनिल कोकीळ हे शिवसेनाप्रणित बेस्ट कामगार सेनेचे पदाधिकारी होते.
अनिल कोकीळ यांचा प्रवसाही तितकाच खडतर होता. याआधी अनिल कोकीळ हे ‘बेस्ट’मध्ये नोकरीला होते. नोकरी सोडून कोकीळ शिवसेनेचे शाखाप्रमुख झाले होते. त्यांच्या मेहनतीचं फळ त्यांना मिळालं आणि त्यांना महापालिकेचं तिकीटही मिळलं. लोकांनीही त्यांच्यावर विश्वास दाखवत परळ गावातून वॉर्ड क्रमांक 204 मधून अनिल त्यांना निवडून दिले. आणि आता तर पक्षाने त्यांना थेट बेस्ट समिती अध्यक्षपद दिलं आहे.