गडकरींचे जल्लोषात स्वागत : गुरुवारी पदभार स्वीकारणार
नागपूर : पंतप्रधान नरेंद मोदी यांच्या मंत्रिमंडळात परिवहन आणि जहाज बांधणी मंत्रालयाची जबाबदारी स्वीकारल्यानंतर भाजपचे राष्ट्रीय नेते नितीन गडकरी यांचे मंगळवारी नागपुरात विमानाने आगमन झाले. यावेळी गडकरी यांनी आपल्याला मिळालेल्या मंत्रालयाचा वापर करीत विदर्भ व महाराष्ट्रातील रस्त्यांचे नेटवर्क गतीने पूर्ण करणार असल्याचे सांगितले. ‘रोडकरी’ अशी ख्याती असलेल्या गडकरींनी रस्त्यांना प्राधान्य देण्याबाबतचे दिलेले संकेत पाहता ‘अब अच्छे रस्ते होने वाले है!’ असे म्हणणे चुकीचे ठरणार नाही.
गडकरी यांचे रात्री ९.४० वाजता नागपुरातील डॉ. बाबासाहेब आंबेडकर आंतरराष्ट्रीय विमानतळावर आगमन झाले. त्यांच्या स्वागतासाठी भाजपच्या स्थानिक नेत्यांसह हजारोंच्या संख्येने कार्यकर्ते जमले होते. गडकरी विमानतळाबाहेर येताच उपस्थितांनी जयघोष करीत एकच जल्लोष केला. यावेळी पत्रकारांशी बोलताना गडकरी म्हणाले, येत्या काळात गरीब, कामगार, शेतकरी यांच्या विकासासाठी सरकार काम करेल. महागाई, बेरोजगार व भ्रष्टाचार या तीन बाबी कमी करण्यासाठी ठोस पावले उचलली जातील. त्या दिशेने काम केले जाईल. आज आपला जन्मदिवस होता.
पंतप्रधान नरेंद्र मोदी यांच्यासह मंत्रिमंडळाने मला शुभेच्छा दिल्या. मंत्रिमंडळाची बैठकही उत्तम झाली. दिवसभर भेटणार्‍यांची गर्दी होती. त्यामुळे आज पदभार स्वीकारता आला नाही. उद्या, बुधवारी दुपारी आपण दिल्लीला परतणार आहोत. त्यानंतर गुरुवारी पदभार स्वीकारू, असेही त्यांनी स्पष्ट केले. स्वागतासाठी उसळलेली गर्दी पाहून ते आनंदाने फुलले होते. ते म्हणाले, नागपूरकरांनी माझ्यावर भरभरून प्रेम केले, विश्वास दाखविला, त्यांच्यामुळेच आज मला ही संधी मिळाली आहे. या संधीचा वापर करीत आपण नागपूर, विदर्भ व महाराष्ट्राचा विकास करू, असा विश्वास त्यांनी व्यक्त केला. गडकरींच्या स्वागतासाठी महापौर अनिल सोले, आ. सुधाकरराव देशमुख, कृष्णा खोपडे, विकास कुंभारे, चंद्रशेखर बावनकुळे, विजय घोडमारे, जिल्हाध्यक्ष डॉ. राजीव पोतदार यांच्यासह मोठ्या संख्येने पदाधिकारी उपस्थित होते. महिला कार्यकर्त्यांचीही संख्या लक्षणीय होती. गडकरींनी उपस्थितांना अभिवादन केले. हारतुरे स्वीकारले, नंतर गाडीत बसून हात उंचावून अभिवादन करीत महालच्या दिशेने रवाना झाले. वाटेत सोमलवाडा परिसरात सनराज कन्स्ट्रक्शनतर्फे गडकरींची लाडूतुला करण्यात आली. यावेळी जोरदार आतषबाजी करण्यात आली. गडकरींना लाडू भरवण्यात आला. यानंतर उपस्थितांमध्ये लाडू वितरित करण्यात आले. जी.एस. कॉलेजमधील गडकरींच्या मित्रांनीही ताफा थांबवून गडकरींचे स्वागत केले. मिठाई वितरित केली. केंद्रीय परिवहन आणि जहाज बांधणी मंत्री नितीन गडकरी यांचे मंगळवारी रात्री नागपूर विमानतळावर जल्लोषात स्वागत करण्यात आले.