ऑनलाइन लोकमत
पुणे, दि. २९ - पुण्यातील हिंजवडी आयटी पार्कमधील इन्फोसिस कंपनीच्या वॉशरुममध्ये एका महिलेवर बलात्कार झाल्याची धक्कादायक घटना घडली आहे. पिडीत महिला इन्फोसिस कॅम्पसच्या कॅन्टीनमध्ये कॅशिअरचे काम करते. महिलेने तक्रार दाखल केल्यानंतर हिंजवडी पोलिसांनी पारितोष बाग व प्रकाश महाडिक या दोघा आरोपींना अटक केली.
हे दोघेही कंपनीमध्ये हाऊसकिपिंगचे काम करतात. रविवारी २७ डिसेंबरला पीडित महिला वॉशरुममध्ये गेली त्यावेळी पारितोष बाग तिच्या मागे गेला. तिथे त्याने महिलेला एकटीला गाठून अत्याचार केला. यावेळी त्याचा साथीदार प्रकाश महाडिक तिथे आले व त्याने बलात्काराच्या घटनेचे मोबाईलवर चित्रीकरण केले.
पीडित महिलेने पोलिसात तक्रार करु नये यासाठी दोघांनी फोटो व्हायरल करण्याची धमकी दिली. पीडित महिलेने दुस-या दिवशी हिंजवडी पोलिस ठाणे गाठून रीतसर तक्रार नोंदवली. त्यानंतर पोलिसांनी दोघांना अटक केली. पोलिसांनी चित्रीकरण केलेला मोबाईल त्यांच्याकडून जप्त केला आहे.