ऑनलाइन लोकमत
नागपूर, दि. १६ - प्रेम संबंधातून गर्भवती झालेल्या मुलीच गळा आवळून खून केल्यानंतर आत्महत्येचा कांगावा करणा-या आईला पोलिसांनी अटक केली. वाडी येथे घडलेल्या या घटनेने सर्वत्र उलट सुलट चर्चेला उधान आले आहे.
मुक्ताबाई समाधान मेश्राम (वय ४५) असे आरोपीचे नाव आहे. तिची मुलगी अंकिता हिचे एका तरुणाशी प्रेमसंबंध होते. त्या तरुणाशी शरिरसंबंध प्रस्थापित झाल्याने तिला गर्भधारणा झाली. मुक्ताबाईला हे माहित पडल्याने तिने अंकिताला त्याबाबत खोदून खोदून विचारले. अंकिता उडवाउडवीची उत्तरे देत होती. बदनामीच्या धाकापोटी मुक्ताबाईने तिला गर्भपात करण्याची विनंती केली. अंकिताने त्याला विरोध केला. त्यामुळे १३ जुलैच्या मध्यरात्री मायलेकीत कडाक्याचे भांडण झाले. रागाच्या भरात मुक्ताबाईने अंकिताचा गळा आवळून खून केला. त्यानंतर तिने आत्महत्या केल्याचा बनाव केला. १४ जुलैला अंकिताचे शवविच्छेदन झाल्यानंतर डॉक्टरांनी गळफास नव्हे तर गळा आवळल्याचा निष्कर्ष अहवालातून व्यक्त केला. त्यामुळे अंकिताच्या कुटुंबीयांना वाडी पोलिसांनी विचारपूस केली.
प्रारंभी असंबंध उत्तरे देणारी मुक्ताबाई पोलिसांच्या चौकशीत जास्त वेळ लपवाछपवी करू शकली नाही. तिने शुक्रवारी रात्री अंकिताच्या खुनाची कबुली दिली. त्यानंतर पोलिसांनी तिला अटक केली. या घटनेमुळे परिसरात उलटसुलट चर्चेला उधान आले आहे.