ऑनलाइन टीम
पुणे, दि. २१ - अंधश्रद्धेविरोधात आयुष्य वेचणा-या डॉ. नरेंद्र दाभोलकर यांच्या मोरक-यांच्या शोधासाठी 'प्लँचेट' करण्यात आल्याचे आऊटलुक मासिकाने दिलेले वृत्त बेजबाबदार असल्याचे सांगत पुण्याचे माजी पोलिस आयुक्त गुलाबराव पोळ यांनी हा दावा फेटाळून लावला आहे. तसेच याप्रकरणी पोल यांनी आऊटलुक मासिक व पत्रकार आशिष खेतान यांना नोटिस पाठवत तब्बल १०० कोटी रुपयांच्या नुकसान भरपाईचा दावा ठोकला आहे.
पुण्यातील पत्रकार परिषदेदरम्यान बोलताना पोळ यांनी आपल्यावरील सर्व आरोप फेटाळून लावले. ' दाभोलकर यांच्या मारेक-यांच्या शोधासाठी प्लॅंचेट करण्यात आल्याचा आरोप करणारा लेख हा केवळ प्रसिद्धीसाठी लिहिण्यात आलेला आहे,' असे ते म्हणाले. स्वत:च्या मासिकाचा खप वाढविण्यासाठी लिहिण्यात आलेला हा लेख बेजबाबदार पत्रकारितेचे उदाहरण आहे व अशा खोट्या लेखामुळे माझ्या अशिलास मानसिक धक्का बसला आहे. खेतान यांचा हा लेख माझ्या अशिलाचे चारित्र्यहनन करणारा आहे,‘ अशी नोटीस पोळ यांच्या वकिलाने खेतान व आऊटलूकच्या संपदाकांना बजावली आहे.
डॉ़ नरेंद्र दाभोलकर यांच्या मारेकऱ्यांचा शोध घेण्यासाठी मांत्रिकाची मदत घेतल्याचे वृत्त प्रसिद्ध झाल्यानंतर मोठी खळबळ माजली होती. याप्रकरणी पोळ यांच्यावर फौजदारी कारवाइची मागणी करणारी जनहित याचिकाही उच्च न्यायालयात दाखल करण्यात आली होती.
दरम्यान दाभोलकरांच्या हत्याप्रकरणाचा तपास आता सीबीआयकडे सोपवण्यात आला आहे.