सिंधुदुर्ग : पक्षापेक्षा कोणीही मोठा नाही. व्यक्तीपेक्षा पक्षसंघटना महत्त्वाची आहे. राष्ट्रवादीचे जिल्हाध्यक्ष व्हिक्टर डान्टस यांच्या नेतृत्वाखाली काम करा. वैयक्तिक स्वार्थासाठी जर कोणी कार्यकर्त्यांना वेठीस धरत असेल तर सिंधुदुर्गातील कार्यकर्ते त्याची कदापि साथ करणार नाहीत. संघटना उभी करण्यासाठी कष्ट लागतील. त्यासाठी तुम्ही पक्षनिष्ठा ठेवा. पक्ष तुमचा सतत सन्मानच करेल, असा विश्वास केंद्रीय कृषिमंत्री शरद पवार यांनी व्यक्त केला. यावेळी त्यांनी राष्ट्रवादीचे बंडखोर आमदार दीपक केसरकर यांचे नाव न घेता त्यांच्यावर टीका केली. शरद कृषी भवनच्या उद्घाटनासाठी शरद पवार बुधवारी सिंधुदुर्गमध्ये आले असता त्यांनी पदाधिकारी व कार्यकर्त्यांना मार्गदर्शन केले़ पवार म्हणाले, सिंधुदुर्गात राष्ट्रवादी पक्ष आपल्याला वाढवायचा आहे. कायदा हातात घेऊ नका. आपण लोकांच्या समस्या जाणून घेऊन त्या पूर्ण होण्यासाठी प्रयत्न केला पाहिजे. (प्रतिनिधी)
पक्षापेक्षा कोणीही मोठा नाही!
By admin | Updated: May 15, 2014 02:59 IST