कधीच काश्मीरमध्ये न राहिलेले देतायत काश्मिरी पंडितांसाठी लढा - नसीरुद्दीन शहांचा अनुपम खेरना टोला

जी व्यक्ती (अनुपम खेर) कधीच काश्मिरमध्ये राहिलेली नाही, तीच व्यक्ती काश्मिरी पंडितांसाठी लढताना दिसत आहे. आता अचानक ती व्यक्ती 'विस्थापित' बनली आहे, अशी टीका नसिरुद्दीन शहांनी केली आहे.

ऑनलाइन लोकमत

मुंबई, दि. २८ - आपल्या उत्कृष्ट अभिनयासाठी तीन वेळा राष्ट्रीय पुरस्काराने सन्मानित करण्यात आलेले दिग्गज अभिनेते नसिरुद्दीन शहा यांनी त्यांचे सहकलाकार व अभिनेता अनुपम खेर यांच्यावर निशाणा साधल्याने त्यांच्यात नवा वाद निर्माण होण्याची चिन्हे आहे. अनुपम खेर हे काश्मिरी पंडितांसाठी लढा देताना, खो-यातील त्यांच्या पुनर्वसनासाठी आवाज उठवताना दिसतात, त्याच मुद्यावरून शहा यांनी खेर यांच्यावर टीका केली आहे. ' जे लोक व्यक्ती (खेर) कधीच काश्मिरमध्ये राहिले नाहीत, तेच आता काश्मिरी पंडितांसाठी लढा देताना दिसत आहे. आता अचानक ती व्यक्ती 'विस्थापित' बनली आहे' अशा शब्दांत नसीरुद्दीन शहा यांनी खेर यांच्यावर निशाणा साधला आहे. शुक्रवारी एका कार्यक्रमादरम्यान बोलतान शहा यांनी खेर यांच्यावर टीका केली तसेच केंद्र सरकारबद्दलही टिपण्णी केली. 

आपल्याकडे लोक (जनता) कोणत्याही सरकारबाबत फार लवकर मतं बनवतात आणि निष्कर्ष काढतात, मात्र त्यांनी अशी घाई करू नये, आपण सरकारला आणखी (सिद्ध करण्यासाठी) वेळ देणं गरजेचं आहे, असे शहा यांनी म्हटले. मात्र शहा यांनी सरकारबाबत काहीप्रश्नही उपस्थित केले.  ज्याप्रमाणे काही पाठ्यपुस्तकांत, अभ्यासक्रमातील माहितीमध्ये काटछाट करून बदल करण्यात येत आहे, ते पाहून काळजी वाटते. मात्र देशाला अंधारयुगाकडे नेण्याइतपत हे सरकार मूर्ख नाही, असेही ते म्हणाले.  

दरम्यान अनुपम खेर यांनीही शहा यांच्या टीकेला ट्विटरवरुन उत्तर दिले आहे. 'शाह साब की जय हो. या (तुमच्या) तर्कानुसार एनआरआय लोकांनी (अनिवासी भारतीय) तर भारताबाबत बिलकुल विचार करायलाच नको' असा टोला खेर यांनी ट्विटरवरून हाणला आहे. 

Shah Saab ki Jai Ho. By that logic NRI's should not think about India at all.:) Naseeruddin Shah on Anupam Kher https://t.co/UtQrtZ66we

— Anupam Kher (@AnupamPkher) May 27, 2016