- ऑनलाइन लोकमत
बाजीराव गणपती , डायमंड वर्क के लेले गणपतीचे आकर्षण
नाशिक, दि. 27 - बाजीराव गणपती, लालबागचा राजा, टिटवाळ्याचा गणपती, पुणेरी पगडीतील गणपती, बाल गणेश, ज्ञानेश्वरी लिहितांना संत ज्ञानेश्वरांच्या रूपातील गणपती अशा विविध रूपातील गणपती मूर्ती शहरातील बाजार पेठेत दाखल झाली आहेत. शहरातील मेनरोड, कॉलेजरोड, द्वारका, सिडको परिसरात ठिकठिकाणी गणपतीमूर्ती विकणारे स्टॉल्स लावण्यात आले आहेत. यावर्षी बाजीराव-मस्तानी चित्रपटातील बाजीराव रूपातील गणपतीमूर्तीला विशेष मागणी असल्याचे चित्र बाजारपेठेत पहायला मिळते.
गणपती बाप्पांचे आगमन अवघ्या दहा दिवसांवर येऊन ठेपले असून, शहरात गेल्या महिनाभरापासून गणेशमूर्ती विक्रीची दुकाने थाटण्यात आली आहेत. नाशिकच्या बाजारपेठेत स्थानिक कारखान्यांसह पेण, अहमदनगर आदि भागांतून गणेशमूर्ती विक्रीसाठी दाखल झाल्या आहेत. शहरातील गणेश भक्तांनी आतापासूनच आपल्या आवडीची गणेशमूर्ती आरक्षित करण्यास सुरुवात केली आहे. नाशिक शहारातील ग्राहकांप्रमाणेच घोटी, इगतपुरी, जळगाव आदि भागांतून गणेशभक्तांनी गणपतीमूर्ती खरेदी करण्यासाठी बाजारपेठेत गर्दी केली आहे. यावर्षी नेहमीच्या मूर्तीपेक्षा ‘डायमंड वर्क’ केलेल्या मूर्तीलादेखील गणेशभक्तांकडून विशेष मागणी होऊ लागली आहे. विविध रंगांतील खडे, बाजूबंद, मुकुट, सोंडपट्टी आदि आभूषणांची आकर्षक सजावट गणेशमूर्तीवर करण्यात आली आहे.
घरगुती गणपती मूर्तीसह सार्वजनिक मंडळासाठी लागणाऱ्या मोठ्या आकारातील गणेशमूर्ती विक्रीसाठी दाखल झाल्या आहेत. रेखीव डोळे, मूर्तीवरील इतर कोरीव काम असलेल्या मूर्ती घेण्याकडे गणेशभक्तांचा विशेष कल दिसून येतो. गणपतीमूर्तीप्रमाणे सजावटीचे साहित्यांची दुकाने सजली आहेत. थर्माेकोलचे मखर, विविध फुले - वेली, इंद्रधनुष्य, चंद्र, लामणदिवा असे विविध प्रकार थर्माेकोल सजावटीचे साहित्य विक्रीसाठी दाखल झाले आहे. (प्रतिनिधी)
डायमंड वर्कच्या मुर्ती खरेदीकडे कल
गणेशोत्सव अवघ्या एका आठवड्यावर येऊन ठेपला असून, विविध प्रकारांतील आकर्षक गणेशमूर्ती विक्रीसाठी ठेवण्यात आल्या आहेत. डायमंड वर्क केलेल्या गणेशमूर्ती आमचे वेगळेपण आहे आणि अशा वर्क केलेल्या गणेशमूर्तींना मोठी मागणी आहे.
सहा इंच ते सात फूट अशा आकारातील मूर्ती विक्रीसाठी दाखल झाल्या आहेत. गेल्यावर्षीच्या तुलनेत यावर्षीही गणेशमूर्तीच्या किमतीमध्ये फारसा फरक नाही. नाशिकप्रमाणेच अमेरिका, हाँगकाँग, फ्रान्स याठिकाणीही गणेशमूर्ती पाठवण्यात आल्या आहेत.
- किरण येवले, गणेशमूर्ती विक्रेता, सुलाई माता कला केंद्र, फावडे लेन