- ऑनलाइन लोकमत
न्यूयॉर्क, दि. 8 - मुख्यमंत्री देवेंद्र फडणवीस यांच्या पत्नी अमृता फडणवीस मॅनहॅट्टन येथे पार पडणा-या न्यूयॉर्क फॅशन वीकमध्ये सहभागी होणार आहेत. इतकंच नाही तर त्या रॅम्पवर उतरणार असून शो-स्टॉपर म्हणून दिसणार आहेत. या फॅशन शोमध्ये मुलींच्या शिक्षणाबद्दल जागृती करण्यात येणार असून आणि भारतीय हातमागाचंदेखील प्रमोशन करण्यात येणार आहे.
पुण्यातील चासा इन्स्टिट्यूट ऑफ डिझाईन आणि टेक्नॉलॉजीच्या वतीने अमृता फडणवीस शो-स्टॉपर म्हणून रॅम्पवर उतरतील. ही इन्स्टिट्यूट गरिब गरजू विद्यार्थ्यांना शिक्षण देते. विद्यार्थ्यांनीच डिझाईन केलेल्या कपड्यांचं यावेळी प्रमोशन करण्यात येणार आहे. विद्यार्थ्यांनी स्वत: डिझाईन केलेले कपडे परिधान करुन मॉडेल रॅम्पवर उतरतील तेव्हा त्यांच्या हातात मुलींच्या शिक्षणावर भर देण्याचं आवाहन करणारे पोस्टर्सदेखील असतील.
अमृता फडणवीस यांनी इंडियन एक्स्प्रेसला दिलेल्या मुलाखतीत 'मुलींच्या शिक्षणावर भर द्या हा संदेश पोहोचवण्यासाठी मी रॅम्पवर उतरणार आहे. ज्यांनी हे कपडे डिझाईन केले आहेत त्या सर्व शेतकरी आणि मजुरांच्या मुली आहेत. हा अभिनव उपक्रम आहे. मुलगी शिकली की एक कुटुंब शिकतं यावर माझा विश्वास आहे. आणि जेव्हा कुटुंब शिकतं तेव्हा देशाची प्रगती होती,' असं बोलल्या आहेत.
अमृता फडणवीस याअगोदरही रॅम्पवर उतरल्या आहेत. काही महिन्यांपूर्वी नॅशनल इन्सिट्यूट ऑफ फॅशन टेक्नॉलॉजीसाठी त्यांनी रॅम्प वॉक केला होता.