लोणी काळभोर : म्हाडाच्या संचालक मंडळाने काही अटी व शर्तींवर थेऊर (ता. हवेली) येथील यशवंत सहकारी साखर कारखान्याच्या एकूण जमिनीपैकी ११७ एकर जमीन विकत घेण्यासाठी अनुकूलता दाखविली आहे, यामुळे यशवंत आगामी काही दिवसांत चालू होण्याचा मार्ग मोकळा झाला असल्याची चिन्हे दिसत आहेत. कोट्यवधी रुपयांचे कर्ज फेडण्यासाठी कोणत्याही वित्तीय संस्था अथवा इतरांनी मदतीचा हात पुढे न केल्याने यशवंत गेल्या तीन हंगामात बंद आहे. कारखान्यावरील कर्ज फेडून कारखाना परत चालू करण्यासाठी कारखान्याच्या मालकीच्या जमिनीपैकी आवश्यक तेवढी जमीन विकण्यास सभासदांनी वार्षिक सर्वसाधारण सभेत ठरावाद्वारे मंजुरी दिली असल्याने गेल्या काही दिवसांपासून ही जमीन म्हाडाला घरबांधणीसाठी विकण्याचे प्रयत्न चालू होते. ही जमीन खरेदी करण्यासाठी म्हाडाने काही अटी व शर्ती घातल्या आहेत. त्यामध्ये ही जमीन शासनातर्फे संपादित होउन तिचा मोबदला दिला नसल्याची खात्री करणे. या जमिनीचा झोन निवासी विभागात रूपांतरित करण्यास कारखान्याने शासनाची तयारी व तात्त्विक मान्यता घेणे; भविष्यात कारखान्यामुळे होणारे प्रदूषण व ते टाळण्यासाठी अथवा आटोक्यात राहण्याकरिता संबंधित विभागाने हमी देणे, सदर ठिकाणी अस्तित्वात असलेल्या उच्च, मध्यम, कमी दाबाच्या विद्युतवाहिन्या कारखान्यामार्फत त्याचे खर्चाने स्थलांतरित कराव्यात. जमिनीवरील सर्व प्रकारची दायित्वे व बोजे प्रत्यक्ष खरेदीपूर्वी संपुष्टात आणावेत. म्हाडाचा हा प्रस्ताव मान्य करून अपेक्षित दराबाबतचा नवीन प्रस्ताव म्हाडास सादर करणे या अपेक्षा म्हाडाने व्यक्त केल्या आहेत. (वार्ताहर)
‘यशवंत’च्या जमीन खरेदीस म्हाडा तयार
By admin | Updated: May 28, 2014 00:25 IST