दुपारपर्यंत समजणार मावळचा खासदार

मावळ लोकसभा मतदारसंघाचा निवडणूक निकाल जाहीर होण्यास काही तासांचाच अवधी उरला आहे. निकालाबाबतची उत्कंठा शिगेला पोहोचली असून, सकाळी आठला मतमोजणी सुरू होऊन दुपारी साडेबारापर्यंत चित्र स्पष्ट होईल.

पिंपरी : मावळ लोकसभा मतदारसंघाचा निवडणूक निकाल जाहीर होण्यास काही तासांचाच अवधी उरला आहे. निकालाबाबतची उत्कंठा शिगेला पोहोचली असून, सकाळी आठला मतमोजणी सुरू होऊन दुपारी साडेबारापर्यंत चित्र स्पष्ट होईल. मावळ मतदारसंघातील संपूर्ण निकाल दुपारी २पर्यंत अधिकृतरीत्या जाहीर होईल. मतमोजणीसाठी प्रशासकीय तयारी पूर्ण झाली आहे. निकालाच्या पार्श्वभूमीवर कडेकोट बंदोबस्त ठेवला आहे. महिन्याभरापासून कोण विजयी होणार, याकडे सर्वांचे लक्ष लागले होते. मावळात कोण बाजी मारणार, देशात कोणाची सत्ता येणार याकडे सर्वांच्या नजरा लागल्या होत्या. ही प्रतीक्षा संपत आली आहे. नागरिकांना लागलेली ही उत्कंठा काही तासांनंतर संपुष्टात येणार आहे. कार्यकर्ते आणि नेत्यांची रात्र जागरणात गेली. मावळसह शिरूर मतदारसंघाची मोजणी बालेवाडी येथील श्री शिवछत्रपती क्रीडा संकुल येथील बॅडमिंटन हॉलमध्ये होणार आहे. प्रत्यक्ष मोजणीस सकाळी आठला सुरुवात होईल. प्रथम टपालाद्वारे आलेल्या मतांची मोजणी होणार आहे. त्यानंतर विधानसभानिहाय एकूण ८४ टेबलावर मोजणीस सुरुवात होईल. विधानसभानिहाय मतदान केंद्राच्या संख्येनुसार मोजणीच्या २६ फेर्‍या होतील. दुपारी दोनपर्यंत अधिकृत निकाल जाहीर केला जाण्याची शक्यता आहे. यासाठी निवणूक यंत्रणा सज्ज झाली आहे. विजयाच्या खात्रीने प्रमुख दावेदारांनी विजयोत्सवाची जय्यत करण्याची तयारी केली आहे. विजयी मिरवणुकीसाठी ढोल-ताशे, बॅन्डपथक बुक केले आहे. गुलाल, भंडार्‍याच्या पोत्यांची मोठी साठवण करण्यात आली आहे. तसेच, झेंडे व चिन्ह सजवून ठेवले आहेत. अनेकांना या मिरवणुकीत सामील होण्याचे निमंत्रण दिले जात आहे. व्हॉट्स अ‍ॅप व फेसबुक या सोशल नेटवर्कवर अभिनंदनाचा वर्षाव करीत आनंद सोहळ्यात सामील होण्याचे आवाहन केले जात आहे. मावळात कोण बाजी मारणार, कोण किती मते घेणार अशी उत्सुकता सर्वांनाच लागली आहे.(प्रतिनिधी)