ऑनलाइन लोकमत
मुंबई, दि. 20 - मुंबई महापालिका निवडणुकीच्या मतदानाला अवघा एकदिवस उरला असताना मुख्यमंत्री देवेंद्र फडणवीस यांनी मुंबईत सामना फक्त शिवसेना आणि भाजपामध्ये असल्याचा दावा केला. मुंबई महापालिका निवडणुकीत काँग्रेस आणि राष्ट्रवादी काँग्रेसचे आमच्यासमोर आव्हान नसून, सामना फक्त शिवसेना आणि भाजपामध्ये आहे असे मुख्यमंत्री देवेंद्र फडणवीस यांनी एबीपी न्यूजला दिलेल्या मुलाखतीत सांगितले.
तसेच उद्धव ठाकरेंविरोधात भ्रष्टाचाराचे पुरावे मिळाले तर कारवाई करणार असे मुख्यमंत्र्यांनी सांगितले. उत्तरभारतीय आणि गुजरातींवर हल्ले करुन शिवसेना मतांचे ध्रुवीकरण करते हे आता मराठी जनतेला कळून चुकले आहे असे फडणवीस म्हणाले.
गुंडांना तिकिट देण्याच्या आरोपावर त्यांनी शिवसेनेनेच सर्वाधिक गुंडांना तिकिटे दिल्याचा दावा केला.
आपले सरकार पाचवर्षांचा कार्यकाळ पूर्ण करेल असा विश्वासही त्यांनी व्यक्त केला. केंद्रात आणि राज्यात सत्तेत भागीदार असलेल्या या दोन्ही पक्षांनी महापालिका निवडणुकीच्या प्रचारात परस्परांवर अत्यंत बोचरी टीका केली.