पुरूषात जळगाव, तर महिलात रत्नागिरी विजयी

राज्यस्तरीय बेसबॉल स्पर्धा : राष्ट्रीय स्पर्धा गोव्यात- महिला व पुरुष दोन्ही गटांतील अंतिम सामने चुरशीचे झाले

सांगली : अनुभवी जळगाव संघाने वेगवान खेळ करत ठाणे संघाचा पराभव करीत पुरुष गटाचे विजेतेपद पटकावले. महिलांमध्ये चपळ रत्नागिरी संघाने सोलापूरला धक्का देत विजयश्री खेचून आणली. यजमान सांगली जिल्ह्यास मात्र तिसऱ्या स्थानी समाधान मानावे लागले. सांगली जिल्हा बेसबॉल असोसिएशन व फिनिक्स स्पोर्टस् अ‍ॅकॅडमी यांच्या संयुक्त विद्ममाने नवव्या वरिष्ठ राज्यस्तरीय बेसबॉल स्पर्धा छत्रपती शिवाजी स्टेडियममध्ये पार पडल्या. आक्रमक फटकेबाजी व बचावाचे कौशल्यपूर्ण तंत्र या स्पर्धेत पहावयास मिळाले. सोलापूर, सांगली, नागपूर, रत्नागिरी, जळगाव, ठाणे आदी संघ प्रारंभीपासूनच आघाडीवर होते. महिला व पुरुष दोन्ही गटांतील अंतिम सामने चुरशीचे झाले. विजेत्या संघांना नगरसेवक गजानन मगदूम यांच्या हस्ते पारितोषिक प्रदान करण्यात आले. अध्यक्षस्थानी महाराष्ट्र बेसबॉल असोसिएशनचे सरचिटणीस राजेंद्र इखणकर होते. स्पर्धा समितीचे सचिव राजेंद्र कदम यांनी स्वागत केले़ उदय गायकवाड यांनी आभार मानले. महाराष्ट्र बेसबॉल संघाच्या महिला संघ प्रशिक्षकपदी प्रा. दीपक राऊत यांची निवड झाली. यावेळी विजय बोरकर, अशोक सरोदे, किरण पवार, आर्यदीप लोंढे, सुरेश हादीमणी, जितेंद्र पाटील, मदन दाभाडे, ज्ञानेश काळे, मुन्ना आलासे आदी उपस्थित होते. या स्पर्धेतून निवडलेला महाराष्ट्राचा संघ गोवा येथील राष्ट्रीय बेसबॉल स्पर्धेत सहभागी होणार असल्याचे राजेंद्र कदम यांनी सांगितले. (क्रीडा प्रतिनिधी)