विमानतळावरून रॅली : चिटणीस पार्कवर सोहळा
नागपूर : पंतप्रधान नरेंद्र मोदी यांच्या मंत्रिमंडळात नागपूरचे सुपुत्र नितीन गडकरी यांना महत्त्वाचे स्थान मिळाल्याने नागपूरकरांचा आनंद द्विगुणित झाला आहे. गडकरी यांचे उद्या, मंगळवारी दुपारी ४ वाजता विशेष विमानाने नागपुरातील डॉ. बाबासाहेब आंबेडकर आंतरराष्ट्रीय विमानतळावर आगमन होणार आहे. येथे कार्यकर्त्यांकडून त्यांचे जंगी स्वागत होईल. विमानतळ ते चिटणीस पार्कपर्यंत भव्य रॅली निघेल. सायंकाळी ६ वाजता चिटणीस पार्क येथे गडकरींचा जाहीर सत्कार केला जाईल. या सत्कार सोहळ्यात भाजपच्या स्थानिक नेत्यांसह विदर्भातील दहाही खासदार सहभागी होण्याची शक्यता आहे. नागपूरची जागा गडकरींनी रेकॉर्डतोड मतांनी जिंकली. नागपूरकांनी मतदानातून गडकरींवर असलेले प्रेम व्यक्त केले. आता मंत्री बनून येत असलेल्या गडकरींच्या स्वागतासाठी नागपूरकर आसुसलेले आहेत. विशेष म्हणजे मंगळवारी गडकरी यांचा जन्मदिवस असल्यामुळे हा आनंद द्विगुणित झाला आहे. गडकरी विमानतळावर पोहोचल्यावर सर्वप्रथम डॉ. हेडगेवार यांच्या प्रतिमेला माल्यार्पण करतील. यानंतर ते कार्यकर्त्यांशी संवाद साधून धन्यवाद देतील. येथून स्वागत रॅली सुरू होईल. या रॅलीत शिवसेनेचे खासदार कृपाल तुमाने, चंद्रपूरचे खासदार हंसराज अहीर यांच्यासह विदर्भातील खासदार उपस्थित राहतील. नेत्यांसाठी एका ट्रॉलीची व्यवस्था करण्यात आली आहे. तिला आकर्षकरीत्या सजविले जाईल. रॅली वर्धा रोड, कॉटन मार्केट, महालमार्गे चिटणीस पार्क पोहोचेल. रॅलीचा समारोप करताना उपमहापौर जैतूनबी यांच्या नेतृत्वात अल्पसंख्यक समाजातर्फे बॅण्डबाजासह गडकरींचे स्वागत केले जाईल. यानंतर चिटणीस पार्क येथे गडकरींचा सत्कार होईल. महापौर अनिल सोले, खा. अजय संचेती, प्रदेशाध्यक्ष आ. देवेंद्र फडणवीस, आ. सुधाकरराव देशमुख, आ. कृष्णा खोपडे, विकास कुंभारे, माजी खा. बनवारीलाल पुरोहित आदी यावेळी उपस्थित राहतील. (प्रतिनिधी)