प्रज्ञा म्हात्रे,
ठाणे- गणपतीच्या दागिन्यांच्या खरेदीसाठी भक्तांची ज्वेलरीच्या दुकानांमध्ये गर्दी उसळली आहे. आपल्या लाडक्या बाप्पाला सजवण्यासाठी वेगवेगळे दागिने खरेदी करताना काय घेऊ अन् काय नको घेऊ, अशी त्यांची अवस्था झाली आहे. दागिन्यांमधील वैविध्य डोळे दिपवून टाकणारे असले तरी ‘फॅन्सी कंठी’चा सर्वाधिक बोलबाला आहे. केवळ चांदीचेच दागिने नाहीत, तर सोन्याचा मुलामा दिलेले अस्सल सोन्यासारखे दिसणारे दागिने उपलब्ध आहेत. गणेशमूर्तीच्या गळ्यात, हातात, पायात सोनेरी रंगाने रंगवलेले दागिने असतात. मात्र, बाप्पाला सजवण्याचा भक्तांमध्ये एक वेगळाच उत्साह असतो. त्यामुळे त्या दागिन्यांवर हे दागिने घातले जातात. सोनेचांदीच्या दागिन्यांबरोबर इमिटेशन ज्वेलरीमध्ये नवनवे प्रकार उपलब्ध आहेत. कंठीमध्ये मोदक कंठी, मोत्याची कंठी, श्रीमंत हार, फॅन्सी कंठी ६९९ ते चार हजार रुपयांपर्यंत आहे. बाप्पाच्या उपरण्यांमध्ये डायमंड, मोती आणि गोल्डन उपरणे असे तीन प्रकार असून ते ३९९ रुपयांपासून दोन हजार रुपयांपर्यंत उपलब्ध आहेत. मुकुटामध्ये यंदा नवीन प्रकार आले असून यात फेटा मुकुट, वेणी मुकुट, बालाजी मुकुट पाहायला मिळत आहे. ४९९ रुपयांपासून चार हजार रुपयांपर्यंत ते उपलब्ध आहेत. सोंडपट्टीमध्ये मण्यांची, झालर व डायमंड हे तीन प्रकार असून ते ४९९ रुपयांपासून १५०० रुपयांपर्यंत मिळत आहेत. मूषकराज यंदा काळ्या रंगामध्ये आला आहे. २९९ ते दोन हजार रुपयांपर्यंत त्याची किंमत आहे. भीकबाळी, कान, कमरपट्टा, छत्र, तोडे, कंगन, कुंडल, दूर्वाचा (पान १ वरुन)... हार, जास्वंदीचा हार, केळीचं पान, मोदकाची चळ, जानवे, बाजुबंद, लामणदिवा, पंचारती, पंचपात्र, उदबत्ती स्टॅण्ड, फुलपरडी, बाप्पाचं उपरणं, गोल्ड प्लेटेड मोदक कंठी, मोत्याची कंठी, खारीक, बदाम, जर्दाळू इत्यादी प्रकारांतला चांदीचा ड्रायफ्रूट सेट, गोल्ड प्लेटेड पाच फळं, परशू अशानानाविध प्रकारच्या दागिन्यांनी दुकाने सजली आहेत. गौरीच्या दागिन्यांनाही ग्राहकांचा प्रतिसादगौरीच्या पारंपरिक दागिन्यांना दरवर्षीप्रमाणे यंदाही चांगलीच मागणी असल्याचे सतीश गायकवाड यांनी सांगितले. यात श्रीमंतहार, राणीहार, चपलाहार, पुतळीहार, लक्ष्मीहार, मणी-मंगळसूत्र, ठुशी, हुडी, झुमके, कमरपट्टा, नथ, पाटली, तोडे, पिछोडी असे दागिन्यांचे प्रकार इमिटेशन ज्वेलरीमध्ये पाहायला मिळतात. हे २९९ रुपयांपासून ३००० रुपयांपर्यंत आहेत असे विक्रेत्यांनी सांगितले. (प्रतिनिधी)>सोनेचांदीच्या दागिन्यांपेक्षा इमिटेशन ज्वेलरीकडे ग्राहक जास्त वळू लागला आहे. कारण, हे दागिने सर्वसामान्यांना परवडतात. १९९ रुपयांपासून पुढे या दागिन्यांची किंमत आहे.- सतीश गायकवाड.