भरधाव ट्रकच्या धडकेत पोलीस कर्मचा-याचा मृत्यू

मालेगाव-वाशिम महामार्गावर अपघातात पोलीस कर्मचा-याचा मृत्यू, दूसरा जखमी.

वाशिम: भरधाव ट्रकच्या धडकेत दुचाकीवरील पोलीस कर्मचारी ठार झाल्याची घटना मालेगाव-वाशिम महामार्गावर गुरुवारी दुपारी १२.३0 वाजताच्या सुमारास घडली. विपुल शेळके असे मृतकाचे नाव आहे.वाशिम येथे स्थानिक गुन्हे शाखेमध्ये कर्तव्यावर असलेले पोलीस शिपाई विपुल शेळके व त्यांचा मित्र धनंजय नितीन इंगोले (रा. काटा, ता.जि. वाशिम) हे कामानिमित्त मालेगाव येथे एमएच ३७ एम ७५७२ क्रमांकाच्या मोटारसायकलने जात होते. दरम्यान, झोडगा फाट्याजवळ असलेल्या नीलकमल धाब्यानजीक समोरून येणार्‍या भरधाव ट्रकने (एमएच २८ बी ७१५३) मोटारसायकलला जोरदार धडक दिली. यामध्ये शेळके यांना गंभीर दुखापत झाली, तर इंगोले किरकोळ जखमी झाले. या दोघांनाही वाशिम येथील खासगी रुग्णालयात उपचारासाठी दाखल करण्यात आले. प्रकृती चिंताजनक असल्याने त्यांना पुढील उपचारासाठी अकोला येथे रवाना करण्यात आले; मात्र वाटेतच शेळके यांची प्राणज्योत मालवली. धनंजय इंगोले यांच्यावर अकोला येथील खासगी रुग्णालयात उपचार सुरू आहेत. त्याच्या प्रकृतीमध्ये सुधारणा होत असल्याची माहिती सूत्रांनी दिली.