उत्सुकता शिगेला..!

पुणे, बारामती, शिरूर व मावळ लोकसभेच्या निवडणुकीचा निकाल उद्या (शुक्रवारी) लागणार आहे. चारही मतदारसंघांत चुरशीची लढत असून, आपल्या मतदारसंघाचा खासदार कोण होणार, याची उत्सुकता शिगेला पोहोचली आहे.

पुणे : जिल्ह्यातील पुणे, बारामती, शिरूर व मावळ लोकसभेच्या निवडणुकीचा निकाल उद्या (शुक्रवारी) लागणार आहे. चारही मतदारसंघांत चुरशीची लढत असून, आपल्या मतदारसंघाचा खासदार कोण होणार, याची उत्सुकता शिगेला पोहोचली आहे. पुणे लोकसभा मतदारसंघात २९ उमेदवार रिंगणात उतरले होते. मात्र, महायुतीचे उमेदवार अनिल शिरोळे, काँग्रेसचे विश्वजित कदम, मनसेचे दीपक पायगुडे व आम आदमी पक्षाचे सुभाष वारे यांच्यात चुरशीची चौरंगी लढत झाली. त्यापैकी कोणाच्या गळ्यात पुण्यातील खासदारकीची माळ पडणार, याची उत्सुकता पुणेकरांना आहे. बारामती लोकसभा मतदारसंघात शरद पवार यांची कन्या सुप्रिया सुळे रिंगणात आहेत. त्याठिकाणी महायुतीच्या वतीने राष्ट्रीय समाज पक्षाचे महादेव जानकर, ‘आप’कडून निवृत्त पोलीस अधिकारी सुरेश खोपडे व बहुजन समाज पक्षाकडून काळुराम चौधरी यांनी निवडणूक लढविली आहे. सुळे यांच्या प्रचारासाठी शरद पवार व उपमुख्यमंत्री अजित पवार यांनी तळ ठोकला होता. तर, जानकर यांच्यासाठी मुंडे यांनी सभा घेतली. त्याठिकाणी महायुतीचे उमेदवार जानकर खाते उघडणार, की पुन्हा सुळे यांनाच खासदारकी मिळणार, याविषयी उत्सुकता आहे. मावळ लोकसभेचे खासदार गजानन बाबर यांना उमेदवारी डावलल्याने, त्यांनी शेतकरी कामगार पक्षाचे उमेदवार लक्ष्मण जगताप यांना पाठिंबा दिला. जगताप यांनी ऐनवेळी उमेदवारी नाकारल्याने राष्ट्रवादीने शिवसेनेतून आलेले राहुल नार्वेकर यांना उमेदवारी दिली होती. महायुतीतर्फे श्रीरंग बारणे यांना उमेदवारी देण्यात आली. तर, ‘आप’कडून मारुती भापकर यांनी निवडणूक लढविली. नार्वेकरांसाठी शरद पवार व अजित पवार, जगताप यांच्यासाठी राज ठाकरे व श्रीरंग बारणे यांच्यासाठी उद्धव ठाकरे व आदित्य ठाकरे या दिग्ग्जांनी हजेरी लावली. शिरूर मतदारसंघात शिवसेनेचे खासदार शिवाजीराव आढळराव, राष्ट्रवादीचे देवदत्त निकम व मनसेचे अशोक खांडेभराड यांच्यात थेट लढत आहे. आढळराव यांना हॅट्ट्रिकची उत्सुकता आहे. त्यांच्यासाठी उद्धव ठाकरे यांनी सभा घेतली, तर निकम यांच्यासाठी विधानसभा अध्यक्ष दिलीप वळसे-पाटील यांनी प्रतिष्ठेची निवडणूक केली आहे. खांडेभराड यांच्यासाठी राज ठाकरे यांनी सभा घेतली. ‘आप’कडून सोपानराव निकम यांनी निवडणूक लढविली असली, तरी आढळराव व निकम यांच्यात कोणाला विजयश्री मिळते, याची उत्सुकता आहे. व्हॉट्स अ‍ॅप व फेसबुक या सोशल नेटवर्कवर अभिनंदनाचा वर्षाव करीत आनंद सोहळ्यात सामील होण्याचे आवाहन केले जात आहे.