ऑनलाइन लोकमत
पेठ. दि. १० - एकतर्फी प्रेमातुन 19 वर्षीय तरुणीवर चाकुहल्ला करुन गंभीर जखमी केल्याची घटना तालुक्यातील शिंदे गावी घडल्याने सर्वत्र खळबळ ऊडाली आहे. यामध्ये गंभीर जखमी तरुणीस पुढील उपचारासाठी जिल्हा रुग्णालयात हलविण्यात आले आहे.
तालुक्यातील शिंदे गावातील तरुणी आपल्या चुलती समवेत आपल्या आजोबांना जेवण घेऊन सकाळी 8 वाजता शेतात गेली, शेतातील कामे अटोपुन दहा वाजेच्या सुमारास शेतातून घराकडे बाळु गाढवे यांच्या शेतातील पायवाटेने परत येत असतांना संशयीत रमेश राघो चारोस्कर (रा. शिंदे, ता. पेठ) याने तरुणीचा रस्ता अडवुन तरुणीसोबत असणा-या चुलतीस ढकलुन दिले व तरुणीचा उजवा हात धरुन " तु माझ्याशी प्रेमसबंध ठेव नाहीतर तुला मारुन टाकेल " असे धमकावत आपल्या हातातील लोखंडी धारधार शस्राने वार केला व विरुध्द दिशेला ओढत नेऊन अश्लील वर्तन केले. तसेच, शिविगाळ करायला लागला. या घटनेने भेदरलेल्या चुलतीने आरडाओरड केल्याने बाजुच्या शेतातील पांडुरंग चारोस्कर व महेंन्द्र चारोस्कर हे धावत आले. त्यांनी तरुणीची सुटका केल्यानंतर तरुणीस ग्रामीण रुग्णालयात उपचारासाठी दाखल करण्यात आले. या घटनेची खबर मिळताच पोलीस ठाण्यात संशयित रमेश राघो चारोस्कर यांच्याविरुध्द गुन्हा नोंद करण्यात आला असुन पुढील तपास पोलीस निरीक्षक विजय सोनवणे यांच्या मार्गदर्शनाखाली पोलीस उपनिरीक्षक सोनवणे व सहकारी करत आहेत. संशयित फरार झाल्याने पेठ पोलीस त्याचा शोध घेत आहेत.