अमर मोहिते , मुंबई - पुणे आरोग्य सेवा विभागात लिपिक पदासाठी अर्ज भरणार्या उमेदवारांनी बोगस टायपिंग सर्टिफिकेट सादर केल्याने महाराष्ट्र प्रशासकीय न्यायाधिकरणाने ही संपूर्ण भरती व निवड प्रक्रियाच रद्द केली़ या निकालात हस्तक्षेप करण्यास हायकोर्टानेही नकार दिला आहे़ विशेष म्हणजे, या पदासाठी निवड झालेल्या काही उमेदवारांनी सुरुवातीस बोगस टायपिंग सर्टिफिकेट सादर केले व नंतर एका खासगी टायपिंग इन्स्टिट्यूटमधील सर्टिफिकेट सादर केले़ मात्र तेही सरकारमान्य नसल्याचा ठपका मॅटने ठेवला़ मॅटचे अध्यक्ष राजीव अग्रवाल व सदस्य श्रीहरी डावरे यांना हा निकाल दिला़ या प्रकरणी या पदासाठी अर्ज भरून निवड न झालेले सोलापूर येथील मेहमूद सुभेदार यांनी अॅड़ अरविंद बांदिवडेकर व भूषण बांदिवडेकर यांच्यामार्फत याचिका दाखल केली होती़ या पदासाठी २००८मध्ये अर्ज मागवण्यात आले़ त्यानंतर याची परीक्षा घेण्यात आली़ तसेच समान गुण मिळालेल्या उमेदवारांचाही अंतिम निवड यादीत समावेश करण्यात येईल, असे जाहीर करण्यात आले़ मात्र शिक्षण पात्रता अधिक असून, इतर उमेदवारांना निवड यादीत आपल्यापेक्षा वरच्या स्थानी ठेवण्यात आले़, असा आरोप सुभेदार यांनी याचिकेत केला़ महत्त्वाचे म्हणजे या परीक्षेत काही उमेदवारांच्या उत्तर पत्रिकेत खाडाखोड झाली होती व काही जणांनी बोगस टायपिंग सर्टिफिकेट सादर केले होते़ हे सर्व माहितीच्या अधिकारात मिळालेल्या माहितीतून उघड झाल्याचेही अॅड़ बांदिवडेकर यांनी मॅटच्या निदर्शनास आणून दिले.त्याची शहानिशा करण्यासाठी लवादाने या भरती प्रक्रियेची नियमावली तपासली़ त्यात टायपिंगचा ३० प्ऱमि़ वेग असलेला उमेदवार या पदासाठी पात्र आहे. दरम्यान, उमेदवारांनी बोगस टायपिंग सर्टिफिकेट सादर केल्याने ही भरती व निवड प्रक्रियाच रद्द केल्याचे मॅटने जाहीर केले़ याला निवड झालेल्या काही उमेदवारांनी उच्च न्यायालयातही आव्हान दिले़ मात्र न्यायालयाने मॅटच्या निकालात हस्तक्षेप करण्यास नकार दिला़ त्यानंतर निवड झालेल्या काही उमेदवारांनी या आदेशाचा पुनर्विचार करावा, अशी विनंती करणारी याचिका मॅटमध्ये दाखल करण्यात आली आहे़
बोगस प्रमाणपत्रांंमुळे भरती रद्द
By admin | Updated: May 21, 2014 03:16 IST