सोलापूर : विद्युत रोषणाई अन् पुष्पमालांनी सजलेले पंचतारांकित हॉटेल बालाजी सरोवर... लग्नघटिका समीप आल्याने भारलेले वातावरण... तमाम सोलापूकरांमध्ये एकच उत्सुकता... निमित्त होते लोकमतच्या ‘चला लग्नाला’ या अनोख्या पाच अंध दाम्पत्यांच्या विवाह सोहळ्याचे. अंधांच्या जीवनामध्ये सोनेरी पहाट घेऊन येणार्‍या या शाही विवाह सोहळ्याला तब्बल अडीच हजाराहून अधिक सोलापूरकरांनी उपस्थिती दर्शवून ‘याचि देही याची डोळा’ हा भावोत्कट सोहळा मनात साठवला आणि नवपरिणितांच्या भावी वाटचालीस शुभेच्छा दिल्या. ‘चला लग्नाला’ या लोकमतच्या पथदर्शी उपक्रमांतर्गत पाच अंध दाम्पत्यांचा शाही विवाह सोहळा तमाम सोलापूरकरांच्या दृष्टीने औत्सुक्याचा विषय ठरला होता. जो तो जणू आपल्याच घरचे कार्य आहे अशा भावनेने अगदी हळदीच्या कार्यक्रमापासून ते लोकमत भवन येथून विवाह स्थळाकडे निघालेल्या वरातीच्या यशस्वितेसाठी झटत होता. चार वाजण्याच्या सुमारास ‘एसएमटी’ सीटीबसमधून पाचही अंध दाम्पत्य आणि वºहाडी मंडळी ‘लोकमत भवन’मध्ये दाखल झाल्यावर आनंदाला उधाण आले.... अन् शाही वरात निघाली. नाशिक ढोलच्या रांगड्या तालावर तरूण वºहाडी थिरकत होती; त्यामुळे आनंद व्दिगुणित होत होता. आसरा चौकात शाही वरात पाहण्यासाठी सोलापूरकर मोठ्या संख्येने उपस्थित होते. सजवण्यात आलेल्या दोन बग्गीमध्ये पाचही दाम्पत्य सर्वांचे लक्ष वेधून घेत होते. पावणेसात वाजता वाजत गाजत वरात विवाहस्थळी पोहचली. बालाजी सरोवरच्या प्रवेशद्वारासमोरच लोकमतचे संपादक राजा माने, सहा. सरव्यवस्थापक रमेश तावडे वºहाडी मंडळींचे अगत्याने आदरातिथ्य करीत होते. सबंध सभागृह वधू-वरांना शुभाशिर्वाद देण्यासाठी तुडूंब भरले होते. यजमान असलेले रोटरी क्लब आॅफ नॉर्थचे अध्यक्ष शिवाजी उपरे, सचिव संतोष भंडारी, नॅबच्या सोलापूर शाखेचे संस्थापक प्रकाश यलगुलवार, सचिव शशीभूषण यलगुलवार ही मंडळी काय हवं नको ते पाहण्यात मग्न होते. मंत्रोपचाराने अक्षता सोहळा सुरु झाला आणि प्रत्येकांच्या चेहर्‍यावरील एक अनोखी समाधानाची लकेर स्पष्ट दिसत होती. या शाही विवाह सोहळ्याचे पौरोहित्य विवेक कुलकर्णी, अण्णा कामतीकर आणि योगेंद्र करजगीकर यांनी केले. या अनोख्या सोहळ्याचे धावते वर्णन मुख्य उपसंपादक शंकर जाधव यांनी केले.
अंधांचा शाही विवाह सोहळा
By admin | Updated: May 26, 2014 02:48 IST