मुंबई : सर्वोच्च न्यायालयाने दिलेल्या आदेशानंतरही कालबद्ध पदोन्नती मिळत नसल्याने सार्वजनिक बांधकाम परिमंडळातील स्थापत्य अभियांत्रिकी सहायकांनी मंगळवारपासून बेमुदत उपोषणास बसण्याचा निर्णय घेतला आहे. केवळ मंडळ-परिमंडळ स्तरावरील अधिकारी दिरंगाई करत असल्याने कर्मचार्‍यांना आर्थिक लाभांपासून वंचित राहावे लागत असल्याचा आरोप सार्वजनिक बांधकाम स्थापत्य अभियांत्रिकी सहायक संघटनेचे अध्यक्ष सिद्धार्थ पवार यांनी सोमवारी पत्रकार परिषदेत केला. या वेळी पवार म्हणाले, विविध १४ पदांवर काम करणार्‍या कर्मचार्‍यांना अभियांत्रिकी सहायक म्हणून नियुक्ती देण्यात आली आहे. १२ वर्षांच्या सलग सेवेनंतर स्थापत्य अभियांत्रिकी सहायकास एक कालबद्ध पदोन्नती मिळते. मात्र सुमारे ५० ते ६० कर्मचार्‍यांना १२ वर्षांच्या सेवेनंतरही पहिली कालबद्ध पदोन्नतीही मिळालेली नाही. तर शासनातर्फे साडेपाच महिन्यांचे व्यावसायिक प्रशिक्षण घेऊन २४ वर्षे सेवा केलेल्या स्थापत्य अभियांत्रिकी सहायकांस दुसरी कालबद्ध पदोन्नती देण्यात आली आहे. मात्र ज्यांना व्यायसायिक प्रशिक्षण देण्यात आले नाही, त्यांना ती नाकारण्यात येत आहे. न्यायालयाच्या आदेशानुसार वयाची ४५ वर्षे पूर्ण झालेल्या कर्मचार्‍यांना सेवेत सूट देण्याची गरज आहे. मात्र अधिकार्‍यांच्या टोलवाटोलवीच्या भूमिकेमुळे सुमारे २५० कर्मचारी पदोन्नतीच्या प्रतीक्षेत असल्याचे जे.वाय. शेख यांनी सांगितले.
सा. बांधकाम कर्मचार्‍यांचे आजपासून उपोषण
By admin | Updated: May 27, 2014 05:31 IST