आकोट : पतसंस्थेतून कर्ज मिळण्यासाठीच्या शिफारसपत्रासाठी एका शिक्षकाकडून १ हजार रुपयांची लाच स्वीकारताना आकोट पंचायत समितीचे गटविकास अधिकारी भाऊराव लांभाटे यांना मंगळवारी सायंकाळी लाचलुचपत प्रतिबंधक विभागाच्या अधिकार्‍यांनी अटक केली. आकोट पंचायत समिती अंतर्गत कार्यरत एका शिक्षकाने अमरावती विभागीय शिक्षक पतसंस्था शाखा अंजनगाव सुर्जी येथे ५ लाख रुपयांचे कर्ज मिळण्यासाठी अर्ज दाखल केला होता. त्यासाठी पंचायत समितीच्या गटविकास अधिकार्‍यांच्या शिफारसपत्राची गरज होती. त्यानुसार शिक्षकाने गटविकास अधिकारी भाऊराव लांभाटे यांना शिफारसपत्र देण्याची मागणी केली. त्यासाठी लांभाटे यांनी शिक्षकाला दोन महिन्यांपर्यंत शिक्षकाला ताटकळत ठेवले आणि अखेर त्याला ५ हजार रुपये लाचेची मागणी केली; परंतु शिक्षक ५ हजार रुपये देण्यास तयार नव्हता. त्याने गटविकास अधिकार्‍यास रक्कम कमी करण्यास सांगितली. बर्‍याच चर्चेनंतर त्यांच्यामध्ये तडजोड होऊन १ हजार रुपयांची लाच देण्याचे ठरले. या प्रकरणी शिक्षकाने लाचलुचपत प्रतिबंधक विभागाकडे गटविकास अधिकार्‍याची तक्रार केली. पैसे देण्याचा दिवस ठरल्यानंतर लाचलुचपत प्रतिबंधक विभागाचे पोलिस उपअधीधक्षक उत्तमराव जाधव यांच्या मार्गदर्शनात अधिकारी व कर्मचार्‍यांनी लांभाटे यांच्या शासकीय निवासस्थानाजवळ सापळा लावला. लांभाटे यांनी १ हजार रुपयांची रोख स्वीकारताच दबा धरून बसलेल्या लाचलुचपत प्रतिबंधक विभागाच्या अधिकार्‍यांनी त्याला रंगेहाथ अटक केली
‘बीडीओ’ गजाआड
By admin | Updated: June 4, 2014 01:38 IST