ऑनलाइन लोकमत
नागपूर, दि. १२ - घातक नायलॉन मांजावर नागपूर पोलिसांनी टाकलेली बंदी मुंबई हायकोर्टाच्या नागपूर खंडपीठानेही कायम ठेवली आहे. नायलॉन मांजाच्या वापरावर अंकूश ठेवण्यात पोलिसांना यश आले असले तरी नायलॉन मांजा विकणा-यांवरच कारवाई का केली जात नाही असा सवाल आता उपस्थित होत आहे.
देशभराप्रमाणे नागपूरमध्येही मकरसंक्रातीचा सण पतंग उडवून साजरा केला जातो. गेल्या काही वर्षांपासून पतंग उडवण्यासाठी नायलॉन मांजाचा वापर वाढला असून हा मांजा जीवघेणा ठरु लागला आहे. नायलॉन मांजामध्ये अडकून गेल्या वर्षी नागपूरमध्ये तिघांचा मृत्यू झाला. तर सुमारे ८०० पक्षी नायलॉन मांजामुळे जखमी झाले होते. यापार्श्वभूमीवर नागपूरचे सहपोलिस आयुक्त अनुपकुमार सिंह यांनी ८ जानेवारी ते ३१ जानेवारी दरम्यान नायलॉन मांजाच्या वापरावर बंदी घालण्याचा आदेश बजावला होता. पोलिसांच्या या आदेशाला पंतग आणि मांजा व्यावसायिकांनी मुंबई हायकोर्टाच्या नागपूर खंडपीठाकडे आव्हान दिले होते. या याचिकेवर सोमवारी सुनावणी झाली. हायकोर्टाने पोलिसांचा आदेश योग्य असल्याचे सांगत बंदी कायम ठेवली. त्यामुळे आता नागपूरमध्ये नायलॉन मांजा वापरल्यास भादंविमधील कलम १८८ अंतर्गत कारवाई केली जाणार आहे.
-------------
जीवघेणा नायलॉन मांजा
नायलॉन मांजा हा पारंपरिक मांजाच्या तुलनेत स्वस्त व अधिक मजबूत असल्यामुळे मागील काही वर्षांपासून नायलॉन मांजाची मागणी वाढली आहे. १०० रुपयांमध्ये नायलॉन मांजा चक्रीसह मिळतो तर पारंपरिक मांजाची विक्री २५० रुपयापासून सुरुवात होते. नायलॉन मांजा हा नायलॉन धाग्यापासून तयार करण्यात येत असून त्यावर रासायनिक प्रक्रिया करून अत्यंत मजबूत बनवला जातो. त्यामुळे नायलॉन मांजा सहसा तुटत नाही व काही वर्षे तसाच राहतो. नायलॉन मांजा नागरिकांच्या जीविताला व आरोग्याला धोका निर्माण करतो.