ट्रक-व्हॅन धडकेत ७ ठार

रधाव ट्रकची ओम्नी व्हॅनला जोरदार धडक बसून झालेल्या भीषण अपघातात एकाच कुटुंबातील सात जण जागीच ठार

कुरूम/मूर्तिजापूर (जि़ अकोला) : भरधाव ट्रकची ओम्नी व्हॅनला जोरदार धडक बसून झालेल्या भीषण अपघातात एकाच कुटुंबातील सात जण जागीच ठार, तर आठ जण जखमी झाले़ मृतांमध्ये तीन बालकांचा समावेश आहे़ हा अपघात सोमवारी पहाटे साडेचारच्या सुमारास अकोला जिल्ह्यातील मुर्तिजापूर तालुक्यातील नवसाळ फाट्याजवळ घडला़ व्हॅनमधील खान कुटुंब पासपोर्ट काढण्यासाठी नागपूरला निघाले होते़मृतांमध्ये आसिफ खान नूर खान (३९), इर्शाद खान नूर खान (३२), इस्माईल खान सत्तार खान (४२), नगमा तरन्नूम आसिफ खान (३२), अब्दुल मुतालिक आसिफ खान (५), मरयम फातेमा आसिफ खान (४), मुकसिद खान इस्माईल खान (३) यांचा समावेश आहे़अकोला येथील खान कुटुंबीय पासपोर्ट काढण्यासाठी मारुती व्हॅनने सोमवारी पहाटे नागपूरकडे रवाना झाले होते. व्हॅनमध्ये चालकासह तब्बल १५ जण प्रवास करीत होते. व्हॅन नवसाळ फाट्याजवळ आल्यानंतर अमरावतीहून अकोल्याकडे जाणाऱ्या भरधाव ट्रकने जोरदार धडक दिली. ही धडक इतकी जबर होती की, यात व्हॅनचा अक्षरश: चुराडा झाला. यात खान कुटुंबातील तीन पुरुष, तीन बालके व एक महिला असे सात जण जागीच ठार झाले, तर अन्य आठ जण जखमी झाले. अपघाताची माहिती मिळताच उपविभागीय पोलीस अधिकारी नंदकुमार काळे यांच्यासह पोलीस घटनास्थळी दाखल झाले़ पोलिसांनी व्हॅनमध्ये अडकलेले मृतदेह व जखमींना बाहेर काढले. जखमींना अमरावती येथे जिल्हा सामान्य रुग्णालयात दाखल करण्यात आले. पोलिसांनी ट्रक जप्त केला असून, फरार झालेल्या ट्रकचालकाविरुद्ध माना पोलिसांत गुन्हा दाखल करण्यात आला आहे़ (वार्ताहर)