औरंगाबाद : मोठ्या बहिणीकडे आलेल्या उत्तर प्रदेशातील एका १७ वर्षीय युवतीने ओढणीने गळफास घेऊन आत्महत्या केल्याची घटना शुक्रवारी दुपारी बजाजनगरात घडली.
शेख समिना शेख आफताब (१७ रा.कुसौरी जि.बस्ती उत्तर प्रदेश) ही मुलगी सहा महिन्यांपासून बजाजनगरातील आपली बहीण फरजाना रिजवान खान यांच्याकडे राहत होती. शुक्रवारी दुपारी १ वाजेच्या सुमारास रिजवान खान हे नमाज पढण्यासाठी बाहेर गेले होते. तर त्यांची पत्नी आपला लहान मुलगा रेहान यास शाळेतून घरी आणण्यासाठी गेली होती. फरजाना खान या मुलास दुपारी १.३० वाजेच्या सुमारास घेऊन घरी परतल्या असता त्यांना घराचा दरवाजा उघडा दिसला. त्यांनी घरात प्रवेश करताच शेख समिना ही ओढणीने गळफास घेतलेल्या अवस्थेत दिसली.
फरजाना यांनी आरडाओरडा केला असता शेजारील नागरिकांनी ही माहिती त्यांच्या पतीला दिली. रिजवान खान यांनी बेशुद्धावस्थेतील शेख समिनाला शासकीय रुग्णालयात दाखल केले असता डॉक्टरांनी तपासून तिला मयत घोषित केले. मुलीने आत्महत्या केल्याचे कळताच तिचे कुटुंबिय औरंगाबादला येण्यासाठी निघाले आहेत. या प्रकरणी एमआयडीसी वाळूज पोलीस ठाण्यात अकस्मात मृत्यूची नोंद करण्यात आली असून पुढील तपास पोलीस निरीक्षक रामेश्वर थोरात यांच्या मार्गदर्शनाखाली पोहेकॉ.आर.डी. राजपूत करीत आहेत