सोलापुरात १४ वर्षीय शाळकरी मुलाचा नरबळी?

दिवेगव्हाण (ता. करमाळा) येथील प्रदीप पांडुरंग निंबाळकर या १४ वर्षांच्या इयत्ता नववीमधील विद्यार्थ्याचा खून करण्यात आला. हा मुलगा गुरुवारपासून बेपत्ता होता.

करमाळा (सोलापूर) : दिवेगव्हाण (ता. करमाळा) येथील प्रदीप पांडुरंग निंबाळकर या १४ वर्षांच्या इयत्ता नववीमधील विद्यार्थ्याचा खून करण्यात आला. हा मुलगा गुरुवारपासून बेपत्ता होता. त्याचा मृतदेह शनिवारी सकाळी उसाच्या फडात आढळून आला़ करमाळा तालुक्यातील केत्तूर येथील सुभाषचंद्र बोस विद्यालयात इयत्ता नववीमध्ये शिक्षण घेत असलेला प्रदीप हा गुरुवारी दुपारी सप्ताहासाठी गावात गेला होता. रात्री परत न आल्याने दुसऱ्या दिवशी शुक्रवारी दिवसभर त्याला शोधण्यात आले. पण त्याचा तपास लागला नाही. शनिवारी सकाळी हिंगणी-देलवडी शिवारात उसाच्या फडात त्याचा मृतदेह मिळाला. पोलिसांना घटनास्थळी प्रदीपच्या गळ्यावर जखमा आढळून आल्या तर मृतदेहाजवळ पुरावा नष्ट करण्याच्या हेतूने अर्धवट खड्डा खणून ठेवला होता. त्याशिवाय टी-शर्टची एक गुंडी मिळाली. नरबळीच्या उद्देशाने तर हा खून झाला नाही ना? अशी गावात चर्चा आहे. त्यामुळे गावात एकच खळबळ उडाली आहे. (वार्ताहर)