दर्जी बोरगाव येथील पद्मसिंह बंकटसिंह ठाकूर हे खासगी नोकरी करतात. शनिवारी रात्री १० वा. वाजेच्या सुमारास ते जेवण करून कुटुंबीयांसह झोपले होते. मध्यरात्री अज्ञाताने घराच्या चॅनल गेटचे कुलूप तोडून आतमध्ये प्रवेश केला. कपाटात ठेवलेले रोख १ लाख २१ हजार व सोन्या- चांदीेचे दीड तोळ्याचे दागिने असा एकूण १ लाख ६६ हजार ६०० रुपयांचा ऐवज चोरुन पसार झाले. चोरटे घराबाहेर पडताना बाहेरून दरवाजा बंद करून निघून गेले.
पहाटेच्या सुमारास पद्मसिंह ठाकूर यांचे वडील बंकटसिंह ठाकूर हे झोपेतून उठल्यानंतर हा प्रकार उघडकीस आला. त्यांनी या घटनेची रेणापूर पोलीस ठाण्याला माहिती दिली. तात्काळ सहाय्यक पोलीस निरीक्षक श्रीराम माचेवाड यांच्यासह पोलिसांनी भेट देऊन पाहणी केली. याप्रकरणी रेणापूर पोलीस ठाण्यात पद्मसिंह ठाकूर यांच्या फिर्यादीवरून अज्ञात चोरट्यांविरुद्ध गुन्हा दाखल केला आहे. अधिक तपास सहाय्यक पोलीस निरीक्षक श्रीराम माचेवाड, बीट अंमलदार कन्हेरे हे करीत आहेत.