उदगीर : दरवर्षीच्या परंपरेनुसार उदगीर येथील गणपतीच्या मूर्तीची प्रतिष्ठापना झाल्यानंतर सातव्या दिवशी जल्लोषात व ढोल-ताशांच्या मिरवणुकीसह भावपूर्ण निरोप देण्याची परंपरा मागील अनेक वर्षांपासूनची आहे. पारकट्टी गल्ली येथील मानाच्या आजोबा गणपतीची आरती झाल्यानंतर मिरवणुकीला सुरुवात होते. परंतु, यावर्षी कोरोनाच्या पार्श्वभूमीवर प्रशासनाने मिरवणुकांना बंदी घातली होती. गणपतीच्या विसर्जनाची संपूर्ण जबाबदारी नगरपालिकेने घेतली होती. नागरिकांनी शांततेत प्रशासनाला सहकार्य करत गुरुवारी लाडक्या गणरायाला भावपूर्ण निरोप दिला.
दरवर्षीच्या परंपरेनुसार पारकट्टी येथील मानाच्या आजोबा सार्वजनिक गणेश मंडळाच्या गणपतीची आरती पोलीस अधीक्षक निखील पिंगळे यांच्या हस्ते झाली. यावेळी अतिरिक्त पोलीस अधीक्षक हिम्मत जाधव, अपर जिल्हाधिकारी अरविंद लोखंडे, उपजिल्हाधिकारी प्रवीण मेंगशेट्टी, तहसीलदार रामेश्वर गोरे, उपविभागीय पोलीस अधिकारी डॅनियल बेन, मुख्याधिकारी भारत राठोड, माजी नगराध्यक्ष व सार्वजनिक गणेश मंडळाचे अध्यक्ष राजेश्वर निटूरे, शहर पोलीस स्थानकाचे गोरख दिवे उपस्थित होते. सकाळी ११ वाजता आजोबा गणपतीची आरती झाल्यानंतर छोट्या गणपतीची मूर्ती नगरपालिकेचे मुख्याधिकारी भारत राठोड यांच्याकडे विसर्जनासाठी देण्यात आली. त्यानंतर मान्यवरांच्या उपस्थितीत नगरपालिकेने सजवलेल्या वाहनात शहरातील २५ तर ग्रामीण पोलीस स्थानकाच्या हद्दीमधील उदगीर शहरांतर्गत असलेल्या १७ अशा एकूण ५८ सार्वजनिक गणपतींचे विसर्जन करण्यात आले. गणेश मंडळांचे कार्यकर्ते आरती झाल्यानंतर गणपतीच्या मूर्ती विसर्जनाला घेऊन जाण्यासाठी नगरपालिकेशी संपर्क करत होते. शहरातील विसर्जन शांततेत पार पडावे, म्हणून पोलीस अधीक्षक निखील पिंगळे, अतिरिक्त पोलीस अधीक्षक हिम्मत जाधव, उपविभागीय पोलीस अधिकारी डॅनियल बेन यांच्या मार्गदर्शनाखाली शहर पोलीस निरीक्षक गोरख दिवे यांनी शहरात ठिकठिकाणी पुरेसा पोलीस बंदोबस्त ठेवला होता.
नगरपालिकेकडून विसर्जनासाठी वाहनांची व्यवस्था...
नगरपालिकेच्या १८ वाहनांद्वारे शहरातील ४७ व शहरालगतच्या विविध भागातील २५ सार्वजनिक व घरगुती मूर्ती विसर्जनासाठी नेण्यात आल्या. नगर परिषदेचे मुख्याधिकारी भारत राठोड यांच्या मार्गदर्शनाखाली विसर्जनाचे काम सुरु होते. यासाठी प्रत्येक वाहनावर एक स्वच्छता निरीक्षक, ५ कर्मचारी, एक पुजारी व चालकाची व्यवस्था करण्यात आली होती.