जिल्ह्यात जून ते सप्टेंबर आजच्या तारखेपर्यंत एकूण ७८ नमुने पाठविण्यात आले होते. त्यापैकी जून महिन्यामध्ये वलांडी २, वांजरवाडा २, लातूर शहर २ आणि रचन्नावाडी येथे २ रुग्ण पॉझिटिव्ह आढळले होते. जून व जुलै महिन्यात एकूण बावीस डेंग्यू पॉझिटिव्ह रुग्ण आढळले आहेत. ऑगस्ट आणि सप्टेंबर महिन्यामध्ये एकूण १४ रुग्णांची त्यात भर पडली आहे. जळकोट १, हकनकवाडी १, नळगीर २, उदगीर १, निलंगा शहर २, हंडरगुळी १, चाकूर २, एकुर्गा खुर्द १, दावणगाव १ आणि रेणापूर शहरात १ रुग्ण आढळला आहे.
दरम्यान, रेणापूर शहरात २०, लातूरमध्ये ३ आणि वलांडी येथील ६ असे २९ नमुने नांदेडच्या प्रयोगशाळेत गुरुवारी तपासणीसाठी पाठवण्यात आले असून, सदर रुग्णांवर संशयित म्हणून उपचार सुरू आहेत. डासोत्पत्ती मोठ्या प्रमाणात वाढल्यामुळे डेंग्यूचा कहर जिल्ह्यात सुरूच आहे. हिवताप कार्यालय तसेच मनपाचा आरोग्य विभाग आणि जिल्हा परिषदेच्या आरोग्य विभागामार्फत धूर फवारणी अबेटिंग मोहीम सुरू करण्यात आली आहे. अबेटिंग मोहिमेचा दोन फेऱ्या पूर्ण झाल्या आहेत, तरीही डेंग्यूचा कहर सुरूच आहे. त्यामुळे लातूर मनपाने कोरडा दिवस पाळण्याचे आवाहन केले आहे.
डेंग्यू संशयित रुग्ण दररोज वाढत आहेत...
लातूर शहरासह जिल्ह्यातील वेगवेगळ्या दवाखान्यांमध्ये
थंडी ताप खोकला सर्दी अशा लक्षणांच्या रुग्णांमध्ये दररोज वाढ होत आहे. शंभर ते दीडशे या लक्षणांच्या रुग्णांची संख्या असल्याचे आरोग्य विभागातील सूत्रांनी सांगितले.
लहान मुलांचे प्रमाण सर्वाधिक....
दवाखान्यात दाखल होणाऱ्या रुग्णांमध्ये लहान मुलांचे प्रमाण सर्वाधिक आहे. बाल रुग्णालयांची ओपीडी वाढलेली आहे. ताप, खोकला, सर्दी तसेच अशक्तपणा अशा आजारांची रुग्ण वाढले आहेत.
कोट.....
जून ते जुलै या दोन महिन्यांमध्ये २२ पॉझिटिव्ह अहवाल प्राप्त झाले होते. ऑगस्ट आणि सप्टेंबर महिन्यात १४ रुग्णांची त्यात भर पडली आहे. सद्य:स्थितीत २९ रक्त नमुने तपासणीसाठी नांदेडच्या प्रयोगशाळेत पाठविण्यात आले आहेत. ज्या भागात रुग्ण आढळले, त्या भागात धूर फवारणी, अबेटिंग फवारणी करण्यात येत आहे.
डॉ. आर. आर. शेख, जिल्हा हिवताप अधिकारी