लातूर: आपल्या व समाजाच्या हितासाठी ईश्वरीय आदेशाचे आयुष्यात पालन करणे गरजेचे आहे. समाजहितासाठी स्वतःला तयार करणे आवश्यक असून, ईश्वराचा मानव कल्याणासाठी जो संदेश आहे़. त्याला समजून तो अंमलात आणला तर आम्ही निश्चितच ईश्वराचे सहाय्यक बनू, असे प्रतिपादन जमाअतचे राष्ट्रीय कार्यकारिणी सदस्य तौफिक असलम खान यांनी केले.
शहरातील हमीदिया मस्जिद येथे जमाअते इस्लामी हिंद द्वारा आयोजित ’कूनू अन्सारूल्लाह अर्थात अल्लाहचे सहाय्यक बना’ या कार्यक्रमप्रसंगी ते बोलत होते. यावेळी तौफिक असलम खान म्हणाले, आज देशामध्ये गुन्हेगारी वाढलेली आहे, महिलांवर अत्याचार वाढलेले आहेत, एक दिवसही असा जात नाही की महिलांविरूद्ध हिंसा किंवा बलात्कार होत नाही. व्याजाच्या विळख्याने अनेक लोकांना आत्महत्या कराव्या लागत आहेत, श्रीमंत लोक गरीबांची लूट करीत आहेत, महागाई वाढलेली आहे, बेरोजगारीचे प्रमाण दिवसेंदिवस वाढत आहे, सरकार स्वतःच्या बळावर समाजाचे व्यापक हित साध्य करू शकत नाही. नागरिकांनाही सरकारच्या मदतीसाठी पुढे यावे लागेल असेही ते म्हणाले.
कार्यक्रमाचा आरंभ मुफ्ती अब्दुल्लाह यांच्या कुरआन प्रवचनाने झाला. प्रास्ताविक शहराध्यक्ष अशफाक अहेमद यांनी केले. एम.आय.शेख यांनी मनोगत व्यक्त केले. जिल्हा उपाध्यक्ष मोहम्मद आरीफ यांनी जमाअते इस्लामी हिंदचा परिचय करून दिला. यावेळी जिल्हाध्यक्ष मिसबाहुद्दीन हाश्मी, शहराध्यक्ष अशफाक अहेमद, जिल्हाउपाध्यक्ष आरीफ शेख, अर्शद फलाही, अन्वरूल्लाह इनामदार यांची प्रमुख उपस्थिती होती.