शहरातील गणेश मंडळांचे पदाधिकारी तसेच पोलीस प्रशासनातील अधिकाऱ्यांची बैठक जिल्हाधिकाऱ्यांनी घेतली. यावेळी या मार्गदर्शक सूचना करण्यात आल्या. ‘श्रीं’ चे आगमन व विसर्जन मिरवणुका काढण्यात येऊ नयेत, अशा सूचना करण्यात आल्या.
सार्वजनिक गणेशोत्सव मंडळांची मंदिरे आहेत. त्यांनी त्या ठिकाणी श्री गणेशाची प्रतिष्ठापना करावी. अन्य ठिकाणी मंडळाचे पदाधिकारी आणि सभासदांच्या घरी प्रतिष्ठापना करावी. कुठल्याही सार्वजनिक ठिकाणी स्थापना करू नये. गणेश मूर्तींची उंची सार्वजनिक गणेश मंडळाकरिता चार फूट व घरगुती दोन फूट उंचीच्या मर्यादेत असावी. ग्रामीण भागात एक गाव-एक गणपती संकल्पना राबवावी. गावामध्ये श्री गणेशाची प्रतिष्ठापना गावातील ग्रामदेवतेच्या मंदिरातच करावी. श्रीगणेश पूजा व आरतीच्या वेळी जास्तीत जास्त पाच व्यक्ती हजर राहतील. सॅनिटायझर, मास्क व सोशल डिस्टन्सिंग पाळणे अनिवार्य राहील. कोरोनाची पार्श्वभूमी लक्षात घेता आरती व पूजन मंडळातील कार्यकर्ते व पुजाऱ्यांनीच करावे. बाहेरील व्यक्तींना त्यात सहभागी करून घेऊ नये.
गणेश दर्शनासाठी दृकश्राव्य माध्यमांचा वापर
श्री गणेशाचे दर्शन घेण्यासाठी मंडळांनी दृकश्राव्य डिजिटल माध्यमांचा वापर करावा, गणेशमूर्तींचे मुखदर्शन अथवा प्रत्यक्ष मंडपात येऊन दर्शन घेण्यास प्रतिबंध करण्यात येत असून, दर्शन केवळ ऑनलाईन अथवा दृकश्राव्य माध्यमातून उपलब्ध करून देण्यात यावे, असे आवाहन जिल्हा प्रशासनाने केले आहे.