शिरूर अनंतपाळ : शहरातून जाणारा मुख्य रस्ता सिमेंट काँक्रिटचा तयार करण्यात आला आहे. परंतु, रस्त्याचे काम दर्जेदार झाले नसल्याने रस्ता काही ठिकाणी चढला तर काही ठिकाणी सखल भाग झाला आहे. त्यामुळे थोडासाही पाऊस झाला तरीही मुख्य प्रवेशद्वारावर जागोजागी तळे साचते. परिणामी, रहदारीस अडथळा निर्माण होत असल्याने नागरिकांतून संताप व्यक्त होत आहे. साचलेल्या पाण्यात बसून एका नागरिकाने आंदोलन केले.
शिरूर अनंतपाळ शहरातून जाणाऱ्या राज्य मार्गावरील वाहतूक दुहेरी व्हावी म्हणून दुभाजकाचे काम करण्यात आले असून, दोन्ही बाजूंनी सिमेंट रस्ता तयार करण्यात आला आहे. परंतु, सिमेंट रस्त्याचे काम अभियांत्रिकी कौशल्य वापरून झाले नसल्याने रस्ता काही ठिकाणी उंच तर काही ठिकाणी खोल झाला आहे. भूरभूर पाऊस झाला तरी खोलगट भागात मोठ्या प्रमाणात पाणी साचत आहे. त्याचा वाहतुकीस मोठा अडथळा निर्माण होत आहे. शिवाय, पाण्याचा अंदाज येत नसल्यामुळे अपघाताचा धोका वाढला आहे. रस्त्यावर साचलेले पाणी चुकविण्यासाठी अनेकजण एकेरी मार्गाचा वापर करीत आहेत. त्यामुळे रस्त्याच्या एका बाजूकडून दुसऱ्या बाजूला वळताना दुचाकी, तीन चाकी, चार चाकी, वाहने स्लिप होऊन पडत आहेत. शहरातून जाणाऱ्या सिमेंट रस्त्याचे काम दर्जेदार पद्धतीने करण्यात यावे, अशी नागरिक, वाहनधारकांतून मागणी आहे.
सार्वजनिक बांधकामचे दुर्लक्ष...
शहरातून जाणारा राज्य मार्ग असल्याने सार्वजनिक बांधकाम उपविभागाच्या अखत्यारित येतो. त्यामुळे सार्वजनिक बांधकाम उपविभागाने हा रस्ता चांगला तयार करणे गरजेचे आहे. परंतु, सार्वजनिक बांधकाम विभागाचे याकडे कमालीचे दुर्लक्ष होत असल्याने नागरिकांना अडचणींना सामोरे जावे लागत आहे. त्यामुळे सार्वजनिक बांधकाम उपविभागाने लक्ष द्यावे, अशी मागणी होत आहे.
रस्त्याच्या दुतर्फा गटारी...
मुख्य रस्त्याच्या दोन्ही बाजूंनी गटारींचे बांधकाम झाले तर सिमेंट रस्त्यावरील सखल भागात थांबणारे पाणी वाहून जाऊ शकते आणि नागरिकांना त्याचा त्रास होणार नाही. परंतु, मुख्य रस्त्याच्या दोन्ही बाजूंना गटारीचे बांधकाम अर्धवट झाले असल्याने जागोजागी तळे साचत आहे.
गटारीच्या बांधकामास मंजुरी...
मुख्य रस्त्यावरील सखल भागात साचणाऱ्या तळ्याबाबत येथील सार्वजनिक बांधकाम विभागाचे उपविभागीय अभियंता रवींद्र पवार म्हणाले, सिमेंट रस्त्याच्या दुतर्फा एक किलोमीटर गटारीच्या बांधकामास मंजुरी मिळाली आहे. कार्यारंभ आदेश मिळताच बांधकाम सुरू होईल.