लातूर : नॅशनल टेस्टिंग एजन्सीद्वारे पहिल्यांदा चार सत्रामध्ये जेईई-मेन्स २०२१ परीक्षा घेण्यात आली. याचा निकाल जाहीर झाला आहे. राजर्षी शाहू महाविद्यालयाचे ६७ टक्के विद्यार्थी जेईई - ॲडव्हान्स्ड परीक्षेसाठी पात्र ठरले आहेत. यात ९९ पर्सेंटाईलपेक्षा अधिक गुण मिळवणाऱ्या १५ विद्यार्थ्यांचा समावेश आहे.
राजर्षी शाहू महाविद्यालय आणि संत तुकाराम नॅशनल मॉडेल स्कूलमध्ये २२९ विद्यार्थ्यांनी ही परीक्षा दिली होती. त्यापैकी १५५ विद्यार्थी जेईई-मेन्स ॲडव्हान्स्ड परीक्षेला पात्र ठरले आहेत. यामध्ये यशस्वी विद्यार्थ्यांचे प्रमाण ६७ टक्के आहे. ज्यामध्ये ९९ पर्सेंटाईलपेक्षा अधिक गुण मिळवणारे १५ विद्यार्थी, ९५पेक्षा अधिक पर्सेंटाईल गुण घेणारे ४० विद्यार्थी, ९०पेक्षा अधिक पर्सेंटाईल गुण मिळवणारे ६५ विद्यार्थी, ८७पेक्षा अधिक पर्सेंटाईल गुण मिळवणाऱ्या ७२ विद्यार्थ्यांचा समावेश आहे.
संस्थेतील तेजस पवन वाकडे या विद्यार्थ्याने ९९.९१ पर्सेंटाईल गुण घेऊन महाविद्यालयातून प्रथम क्रमांक पटकावला. सानिका ज्ञानेश्वर लांडगे या विद्यार्थिनीने ९९.८२ पर्सेंटाईल गुण मिळवून मुलींमध्ये आणि इतर मागास संवर्गातून प्रथम व महाविद्यालयात द्वितीय आली आहे. सृष्टी भगवान जुनघरे या विद्यार्थिनीने ९९.६८ पर्सेंटाईल गुण मिळवून तृतीय क्रमांक पटकावला. गजानन सुरेश सापसोडे हा ९९.४४ पर्सेंटाईल गुण मिळवून ईडब्ल्यूएस संवर्गातून प्रथम आला. अनुसूचित जाती संवर्गातून देवश्री प्रकाश देऊळकर हिने ९८.७७ पर्सेंटाईल गुण मिळवले. अनुसूचित जमाती संवर्गातून साईनाथ साहेबराव रेनेवाड याने ९६.८२ पर्सेंटाईल गुण मिळवले.
या यशाबद्दल संस्थाध्यक्ष व माजी खासदार डॉ. गोपाळराव पाटील, उपाध्यक्ष डॉ. पी. आर. देशमुख, सचिव प्राचार्य अनिरुद्ध जाधव, गोपाळ शिंदे, सुनील सोनवणे, प्राचार्य डॉ. महादेव गव्हाणे, प्राचार्य बी. ए. मैंदर्गी, डॉ. सुहास गोरे, प्रा. दिलीप देशमुख, संजय बिरादार यांनी विद्यार्थ्यांचे कौतुक केले.