शिवानंद पाटील। गडहिंग्लज :
अख्ख कुटुंबं कोरोनाबाधित झालेले, पत्नी, मुलगा, मुलगी गृह अलगीकरणात तर स्वत: कोरोना काळजी केंद्रात अशा अवस्थेत कोरोनावर मात करून परतलेल्या करंबळी (ता. गडहिंग्लज) येथील ‘लोकमत’चे अंकविक्रेते राजाराम इंगळे यांनी इतर रुग्णांना आणि गावकऱ्यांना कोरोनाच्या संकटात मोलाची साथ दिली आहे. त्यांच्या सामाजिक उपक्रमाचे सर्वत्र कौतुक होत आहे.
इंगळे हे ५ मे रोजी कोरोनाबाधित झाले. त्यांच्या कुटुंबातील सदस्यही बाधित झाले. उपचारासह योग आणि मानसिक खंबीरपणामुळेच इंगळे कुटुंबाने कोरोनाची लढाई जिंकली. राजाराम इंगळे हे गडहिंग्लज तालुक्यातील शेंद्री येथील कोविड चाचणी केंद्रात उपचार घेत होते. त्यावेळी त्यांनी बाधित रुग्णांची अवस्था जवळून पाहिली.
कोविड केंद्रातील बरेच रुग्ण हे आजाराच्या दुखण्यापेक्षा मानसिक दुखण्यानेच खचत असल्याचे त्यांच्या निदर्शनास आले. मानसिकता ढासळलेल्या व्यक्ती उपचारांना कसा प्रतिसाद देणार आणि त्यांच्या प्रकृतीत सुधारणा कशी होणार.
त्यासाठी त्यांनी रुग्णांचे मानसिक संतुलन ठीक राहावे, उपचारांना चांगला प्रतिसाद मिळावा आणि जगण्यासाठी सकारात्मक ऊर्जा मिळावी या हेतूने रुग्णांना रोज सकाळी एक तास योगाचे धडे देण्यात सुरुवात केली. सामाजिक अंतर व कोरोना नियमांचे पालन करून रुग्णांचा व्यायाम घेतला.
गेल्या दहा वर्षांपासून इंगळे योगसाधना व एक तास व्यायाम करतात. त्यामुळे कोरोनावर मात करणे त्यांना सहज शक्य झाले.
दरम्यान, मुमेवाडी (ता. आजरा) येथे जि. प. सदस्य उमेश आपटे यांनी सुरू केलेल्या कोविड केंद्रावर जाऊन इंगळे यांनी रुग्णांना योगाचे धडे दिले. त्यावेळी प्रांताधिकारी विजया पांगारकर यांनीही त्यांच्या उपक्रमाबद्दल कौतुक केले.
-------------------------
फोटो ओळी : कोरोनाग्रस्तांना योगाचे धडे..! ‘लोकमत’चे अंकविक्रेते राजाराम इंगळे यांनी कोविड केंद्रातील कोरोना रुग्णांना योगाचे धडे देऊन कोरोनावर मात करण्यासाठी त्यांच्यामध्ये नवी ऊर्जा निर्माण करत आहेत.
क्रमांक : २३०५२०२१-गड-०१