विविध कारणांनी नैराश्य येऊन जिल्ह्यात आत्महत्येचे प्रमाण वाढत आहे. २०१९ मध्ये सुमारे ५७० जणांनी आत्महत्या केल्या तर २०२० या कोरोना संकटात अर्थचक्रच बंद पडल्याने अनेक उद्योगधंदे बंद पडले, नोकऱ्या गेल्या, आर्थिक नुकसान झाले, जवळचे कोरोनाने गेले, माणसे व्यसनाधीन बनली, परिणामी माणसात प्रचंड नैराश्य येऊन स्वत:ला असुरक्षिततेची भावना निर्माण झाली. नकारात्मकता वाढल्याने अनेकांनी जगण्याची उमेद हरवली, त्यातून आत्महत्या केल्या. २०२० मध्ये आत्महत्येचे प्रमाण वाढले, वर्षभरात सुमारे ६१९ जणांनी आत्महत्या केल्या. आता २०२१ च्या सुरुवातीस अनेकजण सावरत असतानाच कोरोनाच्या दुसऱ्या लाटेने पुन्हा डोके वर काढले. हे संकट फक्त आपल्यावरच नाही, सारेच अडचणीत असल्याची भावना अनेकांच्या मनात निर्माण झाली, त्यामुळे गेल्या तीन महिन्यांत कोरोना संकटामुळे आत्महत्येचे प्रमाण कमी झाल्याचे चित्र आहे.
पॉईंटर...
- २०१९ मध्ये झालेल्या आत्महत्या : ५७०
- २०२० मध्ये झालेल्या आत्महत्या : ६१९
- २०२१ जानेवारी ते मार्च : ११४
संकट माझ्या एकट्यावर नाही
कोरोना संकटात मी एकटा अडचणीत नाही तर सारेच अडचणीत आहेत अशी भावाना प्रत्येकात निर्माण झाली पाहिजे. वस्तुस्थितीची जाणीव करून सकारात्मक विचार करून मार्ग काढणे, नैराश्येत मानसोपचार तज्ज्ञ अगर समुपदेशकांकडून उपचार घेणे, कौटुंबीक संवाद, सकारात्मक छंद वाढविणे, अशामुळे आत्महत्येचे प्रमाण कमी येऊ शकेल.
- डॉ. निखिल चौगले, मानसोपचार तज्ज्ञ
कोरोना संकटात १३ आत्महत्या
कोरोना संकटात अडचणीत आल्याने गेल्या वर्षभरात नैराश्येतून जिल्ह्यात तेरा जणांनी कोरोनाचे कारण देऊन आत्महत्या केल्या. इतरही आत्महत्या झाल्या, पण त्यासाठी ठोस कारण प्रशासनाच्या हाती लागले नाही.