शिरोळ : शिरोळ येथील जुन्या तहसील कार्यालयाची इमारत नगरपालिकेला हस्तांतरित करण्याचा प्रस्तावाची तत्काळ कार्यवाही करावी. जिल्हाधिकाऱ्यांनी अपेक्षित असलेली जागा मोजणी करून पालिकेला लवकरात लवकर हस्तांतरित करावी, अशा सूचना जलसंपदामंत्री जयंत पाटील यांनी सोमवारी कोल्हापूर येथे झालेल्या बैठकीत दिली.
नगरपालिकेला जागा कमी पडत असल्याने शिरोळची कचेरी म्हणून ओळखल्या जाणाऱ्या महसूल विभागाच्या जुन्या इमारतीची मागणी नगरपालिकेने जिल्हाधिकाऱ्यांकडे केली आहे. गेल्या अडीच वर्षांपासून तांत्रिक अडचणीमुळे हा प्रस्ताव प्रलंबित आहे. नगराध्यक्ष अमरसिंह पाटील यांनी हा प्रश्न मंत्री जयंत पाटील यांच्याकडे मांडला होता. त्यापार्श्वभूमीवर कोल्हापूर येथे राजर्षी शाहू सभागृहात आढावा बैठक झाली. या वेळी जुने तहसील कार्यालय नगरपालिकेकडे हस्तांतर करण्यासाठी जिल्हाधिकाऱ्यांनी कार्यवाही करावी, अशा सूचना मंत्री पाटील यांनी दिल्या. या वेळी कल्लेश्वर तलाव सुशोभीकरणाच्या अनुषंगाने गायरान जागा वगळून उर्वरित २० टक्के क्षेत्रावर तलाव सुशोभीकरणासाठी परवानगी दिली असल्याचेही या वेळी मंत्री पाटील यांनी सांगितले. बैठकीस आरोग्य राज्यमंत्री डॉ. राजेंद्र पाटील-यड्रावकर, नगराध्यक्ष अमरसिंह पाटील, मुख्याधिकारी तैमुर मुल्लाणी उपस्थित होते.