गांधीनगर : गांधीनगर - वळीवडे रेल्वेस्थानकावर येणाऱ्या - जाणाऱ्या सर्व रेल्वेचा थांबा करावा, अशी मागणी करवीर शिवसेनेचे तालुकाप्रमुख राजू यादव यांच्या नेतृत्वाखालील शिष्टमंडळाने कोल्हापूरचे स्टेशन प्रबंधक ए. आय. फर्नांडिस यांच्याकडे निवेदनाद्वारे केली. निवेदनात म्हटले आहे, गांधीनगर ही पश्चिम महाराष्ट्रातील सर्वात मोठी कापड व्यापारी पेठ आहे. येथे बाहेरगावाहून येणाऱ्या ग्राहकांची तसेच कामगारांची संख्या मोठी आहे. कोरोनाच्या पार्श्वभूमीवर गांधीनगर वळीवडे रेल्वेस्टेशनचा थांबा बंद केला होता. दरम्यान, सध्या सर्व व्यवहार सुरळीत असल्याने कर्मचारी वर्गाला इतर वाहनांनी ये-जा करणे परवडत नाही. त्यामुळे या रेल्वेस्टेशनवर रेल्वेंना थांबा द्यावा. यावेळी रेल्वेचे प्रबंधक फर्नांडिस यांनी याबाबत वरिष्ठांना कळवून निर्णय घेण्यात येईल, असे आश्वासन दिले. यावेळी शिवसेना विभागप्रमुख दीपक पोपटानी, दिलीप सावंत, दीपक अंकल, शाखा प्रमुख सुनील पारपाणी, विनोद रोहिडा, किशोर कामरा, जितू चावला उपस्थित होते.
फोटो : २० गांधीनगर निवेदन
गांधीनगर- वळीवडे रेल्वेस्टेशनवर सर्व रेल्वे गाड्यांचा थांबा करावा, या मागणीचे निवेदन करवीर शिवसेना तालुकाप्रमुख राजू यादव यांच्या नेतृत्वाखाली रेल्वे अधिकारी फर्नांडिस यांना देण्यात आले. यावेळी दीपक पोपटाणी, विनोद रोहिडा व शिवसैनिक उपस्थित होते.