कोल्हापूर : येथील टिंबर मार्केट परिसरात वाहनांमध्ये अवैधरीत्या गॅस भरणाऱ्या युवकांकडून स्थानिक नागरिकांवर हल्ला केल्याची घटना शनिवारी रात्री घडली. पाचजणांनी जुन्या गुरांच्या बाजारातील काही घरांवर दगडफेक करून दारात लावलेल्या तीन दुचाकींची मोडतोड केली. यामुळे परिसरात दहशतीचे वातावरण निर्माण झाले होते. याप्रकरणी संशयितांवर जुना राजवाडा पोलिसांत गुन्हा दाखल झाला आहे.
संशयितांची नावे अशी : सौरभ भोसले, शुभम भोसले, सूरज वाघे, रोहित पाथरवट, अक्षय केसरकर (सर्व रा. टिंबर मार्केट).
पोलिसांनी दिलेली माहिती अशी की, टिंबर मार्केट परिसरातील जुन्या गुरांच्या बाजार परिसरातील महापालिकेच्या रिकाम्या जागेवर सौरभ भोसले आणि शुभम भोसले यांनी शेड बांधले आहे. या शेडमध्ये अवैधरीत्या वाहनांमध्ये गॅस भरला जातो, मद्य विक्रीदेखील केली जाते, असा नागरिकांनी आरोप केला आहे. रात्रीच्या वेळी येथे मद्यप्राशन करणाऱ्या व्यक्तींकडून परिसरात नेहमीच वादावादीचे प्रसंग घडत असल्याच्या तक्रारी आहेत.
शनिवारी रात्री सौरभ भोसले, शुभम भोसले, सूरज वाघे, रोहित पाथरवट, अक्षय केसरकर यांनी विनायक जाधव आणि संदीप जाधव यांच्यावर हल्ला केला. त्यांना सोडविण्यासाठी आलेल्या इतर कुटुंबीयांवरही त्यांनी दगडफेक केली. तसेच रस्त्याकडेला उभारलेल्या तीन वाहनांची तोडफोड केली. याप्रकरणी राजवाडा पोलिसांत तक्रार दाखल करण्यात आली आहे.