कोल्हापूर : छत्रपती शिवाजी चौकातील छत्रपती शिवाजी मार्केटमध्ये मध्यरात्री एका लाॅटरी सेंटरच्या दारात झोपलेल्या फिरस्त्याच्या डोक्यात दगड घालून त्याला जीवे मारण्याचा प्रयत्न झाला. या हल्ल्यात उमेश बाळासाहेब सातपुते (वय ३०, फिरस्ता) हा जखमी झाला आहे. याबाबतची फिर्याद माया उमेश सातपुते (फिरस्ती) हिने लक्ष्मीपुरी पोलीस ठाण्यात नोंदवली आहे. त्यानुसार संशयित म्हणून गंगाराम हिरवे (फिरस्ता) याचे नाव निष्पन्न झाले आहे.
पोलिसांकडून मिळालेली माहिती अशी, शुक्रवारी मध्यरात्री संशयित व जखमी यांच्यात भंगार गोळा करण्याच्या कारणावरून वाद झाला होता. यातून जखमी सातपुते याला शिवीगाळ करत संशयित हिरवे याने जवळ पडलेला पाठासारखा वजनदार दगड घेऊन सातपुते याच्या डोक्यात प्रहार केला. यात सातपुते गंभीर जखमी झाला. याबाबतची माहिती परिसरातील नागरिकांनी पोलिसांना दिली. पोलिसांनी तत्काळ त्याठिकाणी येत जखमी सातपुते याला गंभीर अवस्थेत सेवा रुग्णालयात दाखल केले.
अनेक फिरस्त्यांचे आश्रयस्थान मार्केट
हे मार्केट दोन्ही बाजूनी मोकळे असल्याने अनेक वर्षे फिरस्त्यांचे आश्रयस्थान बनले आहे. येथे नशेमध्ये असलेल्या फिरस्त्यांमध्ये अनेकवेळा वादावादी आणि मारामारीही होते. त्यातूनच एका नशेत असलेल्या फिरस्त्याने दुसऱ्या फिरस्त्याच्या डोक्यात दगड घालून त्याला जीवे मारण्याचा प्रयत्न केला. या फिरस्त्यांचा बंदोबस्त करावा, अशी मागणी गाळेधारकांकडून होत आहे.